មហារីក ត្រូវបានគេដឹងថាគឺជាជំងឺដ៏កាចសាហាវមួយប្រភេទ ដែលធ្វើឲ្យមានហេតុការបាត់បង់អាយុជីវិតខ្ពស់បំផុតលើលោក ។ ដោយជម្ងឺមហារីកមានច្រើនប្រភេទ ដែលអាចកើតឡើងទៅលើមនុស្សគ្រប់វ័យទាំងអស់ ប៉ុន្តែជាញឹកញយបំផុតត្រូវបានគេរកឃើញមានការកើតឡើងចំពោះស្រ្ដីនោះគឺ ជម្ងឺមហារីកអូវែ ។
ដោយជម្ងឺមហារីកអូវែ គឺជាមហារីកទូទៅទីពីរនៃសរីរាង្គបន្តពូជរបស់ស្ត្រី បន្ទាប់ពីមហារីកមាត់ស្បូន។ ហើយវាក៏ជាជម្ងឺមហារីកទូទៅទី៦ចំពោះស្ត្រី ដែលបានឆក់យកជីវិតស្រ្ដីទូទាំងពិភពលោករាប់លាននាក់ក្នុងមួយឆ្នាំៗផងដែរ ។
ជាមួយគ្នានេះ ជម្ងឺមហារីកអូវែ អាចត្រូវបានរកឃើញកើតឡើងចំពោះស្រ្ដីទាំងអស់ ប៉ុន្តែភាគច្រើនកើតមានចំពោះស្ត្រីដែលមានអាយុចាប់ពី 40 ឆ្នាំឡើងទៅ។ ដោយអ្នកជំងឺមហារីកអូវែភាគច្រើនមកជួបគ្រូពេទ្យនៅដំណាក់កាលចុងក្រោយ នៅពេលដែលមហារីកបានរីករាលដាលរួចហើយ។ ដោយសារតែជំងឺនេះនៅដំណាក់កាលដំបូងអ្នកជំងឺមិនមានរោគសញ្ញាអ្វីឡើយ។ ដូច្នេះហើយទើបជាហេតុធ្វើឲ្យការព្យាបាលមិនមានប្រសិទ្ធភាពក្នុងការមានឱកាសជាសះស្បើយនោះឡើយ ។
ខាងក្រោមនេះគឺជាកត្តាហានិភ័យមួយចំនួនដែលបណ្ដាលឲ្យស្រ្ដីកើតមាននូវជម្ងឺមហារីកអូវែ៖
– កើតចេញពីតំណពូជដែលគ្រួសារអាចមានជំងឺមហារីកអូវែ មហារីកសុដន់ ឬមហារីកពោះវៀនធំពីមុនមក
– ស្រ្ដីមានអាយុលើសពី៤០ឆ្នាំ ងាយនឹងវិវត្តទៅជាមហារីកអូវែជាងក្រុមអាយុផ្សេងទៀត
– ស្រ្ដីធ្លាប់មានជំងឺមហារីកសុដន់ ឬមហារីកពោះវៀនធំពីមុនមក
– មហារីកអូវែត្រូវបានរកឃើញចំពោះមនុស្សធាត់ ឬលើសទម្ងន់ជាងមនុស្សស្គម
– ស្រ្ដីដែលមិនធ្លាប់មានផ្ទៃពោះ ជាងអ្នកដែលមានកូន
– ស្រ្ដីដែលមករដូវមុនអាយុ 12 ឆ្នាំ និងអស់រដូវយឺត ឬក្រោយអាយុ 55 ឆ្នាំ
– ស្រ្ដីដែលប្រើប្រាស់ថ្នាំដើម្បីជំរុញការបញ្ចេញពងអូវុលដើម្បីជួយដល់ការមានកូន
– ស្រ្ដីប្រើប្រាស់ថ្នាំអ័រម៉ូនភេទដើម្បីប៉ះប៉ូវពេលអស់រដូវ ។
