ជាធម្មតា នៅពេលស្រ្ដីពពោះហើយមានសុខភាពល្អ នោះវានឹងធ្វើឲ្យទារកដែលនៅក្នុងផ្ទៃកើតមកក៏មានសុខភាពល្អ និងរឹងមាំផងដែរ ។ ជាទូទៅទារកត្រូវបានកើតមកក្នុងចន្លោះពី 37 សប្តាហ៍3ថ្ងៃ ឬលើសពីនេះ ត្រូវបានគេសម្មតថា ទារកគ្រប់ខែដែលទារកត្រូវសម្រាល បានដោយសុវត្ថិភាព មានសុខភាពល្អ និងរឹងមាំ ។
ដោយឡែកក្នុងពេលបច្ចុប្បន្ននេះត្រូវបានគេដឹងថា មានទារកជាច្រើនកើតមិនគ្រប់ខែ ។ ដែលបញ្ហាទាំងអស់នេះ ទំនងជាកើតឡើងដោយសារតែកត្តាម្ដាយនៅពេលពពោះមានបញ្ហាសុខភាព ដូចជាជំងឺទឹកនោមផ្អែម ឬធ្វើនូវរឿងគ្រោះថ្នាក់អំឡុងពេលមានផ្ទៃពោះមួយចំនួន ដូចជាការជក់បារី ឬផឹកនូវភេសជ្ជៈអាកុល ។
រួមជាមួយនឹងកត្តាជាច្រើនទៀតផងដែរ ដូចជា ៖
-
- ស្រ្ដីពពោះ មានអាយុក្រោម១៨ឆ្នាំ ឬលើសពី 35 ឆ្នាំឡើងទៅ
- ម្តាយមានវ័យជំទង់ទំនងជាមានសម្ពាធឈាមខ្ពស់អំឡុងពេលមានផ្ទៃពោះ
- ស្ត្រីវ័យចំណាស់ មានបញ្ហាសុខភាពមុនពេលមានផ្ទៃពោះ ឬធ្លាប់មានកូនច្រើនពីមុន
- ស្រ្ដីដែលពពោះកូនភ្លោះ (កូនភ្លោះបី ឬច្រើនជាងនេះ)
-
- ស្រ្ដីដែលមានបញ្ហាសុខភាពដូចជា ជំងឺទឹកនោមផ្អែម ជំងឺលើសឈាម ជំងឺធ្លាក់ទឹកចិត្ត ឬសម្ពាធឈាមខ្ពស់
- បញ្ហាជាមួយនឹងការមានផ្ទៃពោះពីមុន ចំពោះស្ត្រីដែលសម្រាលកូនមុនអាយុ ឬទារកកើតមកមានបញ្ហាសុខភាព ឬពិការភាពពីកំណើត
- ការឆ្លងមេរោគតាមទ្វារមាស ទឹកនោម ឬឈាម
- ស្បូនខុសប្រក្រតី ឬមាត់ស្បូនខ្សោយ
- ធ្វើការលើសកម្លាំង
- ញ៉ាំមិនគ្រប់គ្រាន់ ឬខ្វះអាហារូបត្ថម្ភ ជាពិសេសខ្វះជាតិដែក និងអាស៊ីដហ្វូលិក
- គេងមិនគ្រប់គ្រាន់
- ប្រើថ្នាំផ្ដេសផ្ដាស ដោយគ្មានវេជ្ជបញ្ជា។