ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានរិះគន់មន្ត្រីមន្ទីរព័ត៌មានថ្នាក់ខេត្តចំៗ ដែលមិនយកចិត្តទុកដាក់ក្នុងការផ្សព្វផ្សាយផលិតផលដែលតាំងពិព័រណ៌ តែបែរគិតតែថត និងបញ្ជូនសកម្មភាពថ្នាក់ដឹកនាំខេត្តទៅវិញ។
«ចង់និយាយរឿងមួយ!» លោក ខៀវ កាញារីទ្ធ បានផ្តើមសេចក្តីយ៉ាងដូច្នេះនៅលើសំណេរហ្វេសប៊ុករបស់ខ្លួន កាលពីថ្ងៃទី៤ ខែសីហា ដោយលោកបានរៀបរាប់ថា លោកបានដើរមើលពិព័រណ៌ផលិផលខ្មែរ ដែលក្រសួងពាណិជ្ជកម្មរៀបចំនៅក្នុងសណ្ឋាគារសុខា នាអំឡុងនៃកិច្ចប្រជុំរដ្ឋមន្ត្រីការបរទេសអាស៊ាន។
ក្រោយរដ្ឋមន្ត្រីប្រជុំ កាលពីថ្ងៃទី៣ ខែសីហា លោកសង្កេតឃើញ ផលិតផលច្រើនដែលត្រូវបានដាក់តាំងបង្ហាញ ហើយមួយចំនួនធំមកពីតាមបណ្តាខេត្ត។ «ប៉ុន្តែខ្ញុំបានដឹងតិចបំផុតពីផលិតកម្មមួយចំនួនធំ ព្រោះមន្ទីរព័ត៌មាននៅតាមខេត្តរវល់តែបញ្ជូនសកម្មភាពរបស់ថ្នាក់ដឹកនាំខេត្ត ហើយមិនយកចិត្តទុកដាក់បង្ហាញពីសក្តានុពលរបស់ខេត្តខ្លួន»។
លោក ខៀវកាញារីទ្ធ បានស្នើថា «ផ្នត់គំនិតនេះ ល្មមដូរហើយ ។ ថ្នាក់ដឹកនាំខេត្តល្អ គឺថ្នាក់ដឹកនាំដែលចេះបង្កើតការងារដល់ពលរដ្ឋក្នុងខេត្តខ្លួនទៅវិញទេ !»៕