ជំងឺនៃភាពស្លេកស្លាំង គឺជាជំងឺមួយប្រភេទដែលតែងតែកើតមានឡើងនៅពេលដែលចំនួនកោសិកាឈាមក្រហមទាបជាងធម្មតា។ ជាងនេះទៅទៀត បើអ្នកមិនបានព្យាបាលវាទាន់ពេលវេលាទេនោះ វានឹងវិវត្តន៍កាន់តែធ្ងន់ធ្ងរ រហូតធ្វើឱ្យរាងកាយខ្សោយ អស់កម្លាំង និងស្លេកស្លាំង ។ជំងឺក៏ត្រូវបានគេដឹងថា ភាគច្រើនកើតឡើងទៅលើស្រ្ដី ដោយសារតែពួកគេត្រូវឆ្លងកាត់ការមករដូវជាប្រចាំខែ។
ខាងក្រោមនេះគឺជាសញ្ញាទាំង៤ ដែលបង្ហាញថាអ្នកកំពុងតែប្រឈមជាមួយនឹងជំងឺស្លេកស្លាំងធ្ងន់ធ្ងរដែលមិនគួរព្រងើយកន្តើយឡើយ ៖
– ស្បែកស្លេកស្លាំងខុសពីធម្មតា
នៅពេលដែលរាងកាយកើតមាននូវជំងឺស្លេកស្លាំង នោះវានឹងបណ្ដាលឲ្យស្បែករបស់អ្នកប្រែជាស្លេកស្លាំងដោយសារតែខ្វះកោសិកាឈាមក្រហម។ កោសិកាទាំងនេះមានផ្ទុកអេម៉ូក្លូប៊ីនដែលដឹកអុកស៊ីសែនទៅកាន់កោសិកាផ្សេងទៀតនៃរាងកាយ។ ដោយឡែកចំពោះស្ត្រីជំងឺស្លេកស្លាំង ក៏អាចត្រូវបណ្តាលមកពីរបួស ការវះកាត់ ការសម្រាលកូន ឬការមករដូវច្រើន ផងដែរ។ដោយអាការៈនៃជំងឺទាំងអស់នេះ អាចបណ្ដាលឲ្យអ្នកជួបគ្រោះថ្នាក់ធ្ងន់ធ្ងរ ប្រសិនបើមិនបានព្យាបាលទាន់ពេលវេលាទេនោះ វានឹងបង្កើនហានិភ័យនៃផលវិបាកដ៏គ្រោះថ្នាក់ ជាពិសេសចំពោះស្ត្រីមានផ្ទៃពោះ។
– កើតមានដំបៅមាត់
ការកើតមានដំបៅមាត់ ក៏អាចទាក់ទងជាមួយនឹងជំងឺនៃភាពស្លេកស្លាំងផងដែរ។ជាមួយគ្នានេះភាពស្លេកស្លាំងទាំងអស់នេះ ក៏អាចបណ្ដាលឱ្យរាងកាយខ្វះវីតាមីនសំខាន់ៗជាច្រើនផងដែរ ជាពិសេសវីតាមីន B12 និងជាតិដែក ដើម្បីបង្កើតកោសិកាឈាមក្រហម។ ព្រមទាំងធ្វើឲ្យអ្នកជម្ងឺជួបប្រទះនឹងការបាត់បង់ចំណង់អាហារ ខ្សោយកម្លាំង ដំបៅមាត់ និងឈឺក្នុងមាត់រយៈពេលយូរជាដើម … ។
– ឃ្លានអាហារឥតឈប់ឈរ
ការឃ្លានអាហារឥតឈប់ឈរ បើទោះបីជាទទួលទានអាហាររួចទៅហើយក្ដី វាក៏អាចជារោគសញ្ញានៃជំងឺភាពស្លេកស្លាំងផងដែរ។ដោយអ្នកដែលមានជំងឺស្លេកស្លាំង តែងតែមានអតុល្យភាពក្នុងការទទួលទានអាហារ ដែលបណ្ដាលឲ្យពួកគេតែងតែមានអារម្មណ៍ថាឃ្លាននូវអាហារសម្រន់ផ្សេងៗបន្ថែមទៀត ជាពិសេសចង់ទទួលទានអាហារសម្រន់ ជាជាងការទទួលទានបាយ។
– ក្រចកងាយផុយ និងបាក់
កោសិកាទាំងអស់នៅក្នុងរាងកាយ គឺត្រូវការអុកស៊ីសែនចាំបាច់បំផុតដើម្បីដំណើរការ ដែរដូចគ្នាចំពោះក្រចកដៃ និងក្រចកជើងផងដែរ ។ នៅពេលដែលរាងកាយមានជំងឺនៃភាពស្លេកស្លាំង ក្រចកនឹងមិនអាចទទួលបានអុកស៊ីសែនគ្រប់គ្រាន់នោះទេ។ ជាហេតុធ្វើឲ្យពួកគេមិនអាចបង្កើតកោសិកាថ្មី ដែលធ្វើឱ្យក្រចករឹងមាំបានឡើយ ដូច្នេះហើយទើបជាហេតុធ្វើឲ្យ អ្នកជម្ងឺងាយជួបប្រទះនឹងក្រចកស្ងួត ផុយ និងបាក់ ។