ភ្នំពេញ៖ យោងអង្គការសមាគមធាងត្នោត បានរកឃើញថា ផ្ទៃបឹងតាមោក ឬបឹងទំនប់កប់ស្រូវជិត ៦៥% ត្រូវបានរដ្ឋាភិបាលសម្រេចកាត់ប្រគល់ទៅឱ្យឧកញ៉ា ក្រុមហ៊ុនឯកជន និងស្ថាប័នរដ្ឋចំនួន ៤៣ដង ដើម្បីធ្វើជាកម្មសិទ្ធិ ក៏ដូចជាដោះដូរ ដែលធ្វើឱ្យទំហំផ្ទៃបឹងតាមោកមួយនេះនៅសល់តែជាង ១ពាន់ហិកតារប៉ុណ្ណោះ។
យ៉ាងណាមិញនាព្រឹកមិញនេះពាក់ព័ន្ធនឹងរឿងចាក់ដីលុបបឹងតាមោកលោកបណ្ឌិត សុខ ទូច ក៏បានបង្ហោះសារនៅលើផេកហ្វេសប៊ុកផ្លូវការដោយលើកឡើងបែបនេះថា៖ «ព្រឹកនេះ ខ្ញុំធ្វើដំណើរមកកន្លែងធ្វើការ ឃើញគេចាក់ដីលុបបឹងតាមោក ខ្ញុំទប់អារម្មណ៍មិនបាន ប្រើភាសាមិនពិរោះស្ដាប់។
តើអ្នកមានស្រុកខ្មែរ ពេលណាទើបលែងចង់មានបានដោយសារលុបបឹង? ដូនតាសម័យយអង្គរ លោកបានជីកស្រះ ជីកបារាយណ៍ ជីកកសិន្ធដើម្បីរក្សាទឹកទុក សម្រាប់ធ្វើកសិកម្ម ឬទប់ទឹកជំនន់ ចុះហេតុអ្វីអ្នកមានសម័យថ្មីលុបបឹងដើម្បីតែផលប្រយោជន៍ដុល្លារតែមួយគត់ ហើយអ្នកនិយាយថាធ្វើដើម្បីបុព្វហេតុដូនតារបស់ខ្មែរ។
តើអ្នកមិនមើលរាល់ប្រាសាទរបស់ខ្មែរណាដែលមិនមានកសិន្ធ តើទីតាំងដែលខ្មែររស់នៅពីដើម កន្លែងណាមួយដែលមិនមានប្រព័ន្ធទឹក និងស្រះដើម្បីរក្សាទឹក?»។
គួរជម្រាបដែលថា បឹងតាមោកមានផ្ទៃដីសរុប ៣២៣៩ហិកតារ) ជាអាងស្តុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់ជាសម្បត្តិសាធារណៈរបស់រដ្ឋ។ បឹងធម្មជាតិមួយនេះមានប្រជាជនរស់នៅជុំវិញប្រមាណ ៣០០គ្រួសារ និងមានមនុស្សប្រហែល ១ពាន់នាក់ដែលភាគច្រើនប្រកបរបរចិញ្ចឹមជីវិតដោយការនេសាទត្រី ដាំដំណាំ ចិញ្ចឹមត្រី និងរកស៊ីលក់ដូរនៅផ្ទះ ៕