មានមនុស្សជាច្រើនដែលតែងតែជួបប្រទះនូវបញ្ហាដំណេក រហូតដល់ពួកគេជ្រើសរើសប្រើប្រាស់ថ្នាំដើម្បីជួយក្នុងការគេង។ប៉ុន្តែការប្រើប្រាស់ថ្នាំងងុយគេងច្រើនក៏អាចមានផលប៉ះពាល់ដល់រាងកាយផងដែរ ។ ដូច្នេះដើម្បីចៀសវាងពីការប្រើប្រាស់ថ្នាំ លោកអ្នកអាចសាកល្បងវិធីសាមញ្ញាៗខាងក្រោមនេះ ដើម្បីព្យាបាលបញ្ហាទាំងអស់នេះមុននឹងឈានទៅប្រើដល់ការប្រើប្រាស់ថ្នាំ។
បើយោងទៅតាមលោកវេជ្ជបណ្ឌិត Ongnuch Chawalitthamrong ជាវេជ្ជបណ្ឌិតរបស់ក្រុមប្រឹក្សាភិបាលអាមេរិចនៃឱសថប្រឆាំងភាពចាស់ មកពីមជ្ឈមណ្ឌល Addlife Anti-Aging Center ជាន់ទី 2 បានបង្ហាញប្រាប់ឲ្យដឹងថា មនុស្សគ្រប់រូបត្រូវតែមានការស្វែងយល់អំពីវដ្តនៃការទទួលទានដំណេក នឹងការបញ្ចេញអ័រម៉ូន Melatonin ឲ្យបានត្រឹមត្រូវព្រោះតែការទទួលទានដំណេកបានលក់ស្រួល និងស្កប់ស្កល់ ធ្វើឱ្យយើងភ្ញាក់ឡើងជាមួយភាពស្រស់ស្រាយ និងទទួលបានសុខភាពល្អពេញលេញ ។
ខាងក្រោមនេះគឺជាវិធីសាមញ្ញាមួយចំនួនក្នុងការជួយឲ្យអ្នកអាចទទួលបានការគេងលក់ស្រួលដូចជា ៖
1. ចេញក្រៅដើម្បីទទួលពន្លឺព្រះអាទិត្យរយៈពេល 30 នាទីបន្ទាប់ពីភ្ញាក់ពីគេងនៅពេលព្រឹក ព្រមទាំងការបើកវាំងននដើម្បីឱ្យពន្លឺចូលក្នុងបន្ទប់គេង ឬហាត់ប្រាណនូវវិធីសាមញ្ញាៗនៅខាងក្រៅផ្ទះ ដើម្បីធ្វើឱ្យវដ្តមេឡាតូនីនកាន់តែប្រសើរឡើង និងទទួលបានវីតាមីន D ផងដែរ។
2. ពេលគេងត្រូវបិទភ្លើងក្នុងបន្ទប់ ដើម្បីឱ្យងងឹតទាំងស្រុង និងហាមប្រើប្រាស់ឧបករណ៍ដែលបញ្ចេញពន្លឺពណ៌ខៀវ ដូចជាទូរសព្ទដៃ និងទូរទស្សន៍ ដែលបណ្តាលឱ្យមានការបញ្ចេញជាតិ Melatonin មិនល្អ យ៉ាងហោចណាស់ 2 ម៉ោងមុនពេលចូលគេង ។
3. ជៀសវាងការគេងពេលថ្ងៃ បើចាំបាច់មិនគួរលើសពី 30 នាទី
4. កុំហាត់ប្រាណនៅពេលយប់់ ដូចជាក្រោយម៉ោង៦ល្ងាច
5. កុំទទួលទានជាតិកាហ្វេអ៊ីនក្រោយម៉ោង 3 រសៀល
6. ជៀសវាងការទទួលទានគ្រឿងស្រវឹង
7. ហាមទទួលទានទឹកពេលជិតចូលគេង ព្រោះវាអាចបណ្តាលឱ្យភ្ញាក់ពីដំណេកនៅពាក់កណ្តាលយប់។
សរុបមក វិធីខាងលើនេះលោកអ្នកអាចធ្វើការអនុវត្តដើម្បីជួយបញ្ហាដំណេក ប៉ុន្តែប្រសិនបើធ្វើបែបនេះហើយនៅតែមិនទទួលបានលទ្ធផលល្អប្រសើរទេនោះ លោកអ្នកគួរតែទៅពិគ្រោះជាមួយគ្រូពេទ្យ ដើម្បីធ្វើរោគវិនិច្ឆ័យនិងកំណត់ពីមូលហេតុឲ្យបានច្បាស់លាស់៕
