ភ្នំពេញ ៖ លំនៅដ្ឋានរបស់ពលរដ្ឋចំនួន៤០ខ្នងត្រូវបានភ្លើងឆេះបំផ្លាញ ខ្ទេចគ្មានសល់ អស់ទាំងទ្រព្យសម្បត្តិជាច្រើនទៀតផង ដោយសារបុរសញៀនថ្នាំម្នាក់ ដុតផ្ទះខ្លួនឯង ឆេះរាលដល់ផ្ទះអ្នកជិតខាង បង្កឲ្យភ្ញាក់ផ្អើលកាលពីវេលាម៉ោង៤និង១៥នាទីរសៀល ថ្ងៃទី២០ ខែមិថុនា ឆ្នាំ២០២២ នៅក្នុងភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
តាមសមត្ថកិច្ចបានឲ្យដឹងថា អគ្គិភ័យខាងលើផ្តើមដោយ បុរសញៀនថ្នាំម្នាក់ ដុតផ្ទះខ្លួនឯង ដែលជួលពីគេដើម្បីស្នាក់នៅ បណ្តាលឲ្យឆាបឆេះរាលដល់ផ្ទះអ្នកជិតខាង ចំនួន៧ខ្នង ខូចខាតទាំងទ្រព្យសម្បត្តិអស់ជាច្រើន ។
ជនបង្កឈ្មោះ លឹម ភារុណ ភេទប្រុស អាយុ ៤២ឆ្នាំ មុខរបររើសអេតចាយ ។
យោងតាមប្រភពព័ត៌មាននៅកន្លែងកើតហេតុ អោយដឹងថា នៅមុនកើតហេតុ គេឃើញជនបង្ក បានឈ្លោះប្រកែកគ្នាជាមួយស្ត្រីជាប្រពន្ធ លុះមិនបានប៉ុន្មានផង ជនបង្កជាប្តីក៏បានយកភ្លើងដុ.តផ្ទះខ្លួនចោល បង្កអោយមានជាអណ្តាតភ្លើងឆាបឆេះឡើង ហើយក៏បានរាលដាលជាបន្តបន្ទាប់ដល់ផ្ទះជាប់នោះយ៉ាងសន្ធោរសន្ធៅតែម្តង ព្រោះតែផ្ទះនៅតំបន់នោះ សង់ជាប់ៗគ្នាយ៉ាងរដឹក ។
តាមប្រភពដដែលបានបន្តថា ភ្លាមៗនោះ កម្លាំងអាជ្ញាធរមូលដ្ឋាន រួមទាំងរថយន្តពន្លត់អគ្គិភ័យ មកពីតាមបណ្តាអង្គភាពពាក់ព័ន្ធជាច្រើនគ្រឿង បានចុះធ្វើការអន្តរាគមន៍បាញ់ទឹកពន្លត់អណ្តាតភ្លើងកំពុងឆាបឆេះ ។ ក្រោយការខិតខំអន្តរាគមន៍ប្រមាណជាង១ម៉ោងរួចមក អណ្តាតភ្លើង បានរលត់អស់ទៅវិញ ដោយបានឆាបឆេះបំផ្លាញផ្ទះសរុប៣៧ខ្នង ។
ក្នុងករណីខាងលើនេះ សមត្ថកិច្ចប្រើប្រាស់រថយន្តអគ្គីភ័យអស់សរុបអស់៤០គ្រឿង ។ ក្នុងនោះដែរ មិនបណ្តាលអោយមនុស្សណាម្នាក់រងរបួស ឬស្លា.ប់ឡើយ ។ ដោយឡែក ចំពោះជនបង្កដែលដុ.តផ្ទះ បង្កអោយមានការឆាបឆេះនោះ ត្រូវបានសមត្ថកិច្ចឃាត់ខ្លួនបញ្ចូនទៅកាន់ ប៉ុស្តិ៍រដ្ឋបាលនគរបាលច្បារអំពៅទី២ ដើម្បីសាកសួរនាំ និងបន្តនីតិវិធីច្បាប់ផងដែរ ៕
