រាជធានីភ្នំពេញ ៖ រថយន្តក្រឡុកស៊ីម៉ងត៍មួយគ្រឿង បើកមិនប្រយ័ត្នបានទាក់ខ្លោងទ្វារវត្តត្រពាំងឈូកបណ្តាលឲ្យដួងរលំគ្រាំង រងការខូចខាតទាំងស្រុង លុះកម្លាំងសមត្ថកិច្ច ចុះអន្តរាគមន៍ ធ្វើការឃាត់ខ្លួនអ្នកបើកបររថយន្តបង្ក ដើម្បីធ្វើការសួរនាំ ស្រាប់តែមេការក្រុមហ៊ុនរថយន្តក្រឡុកស៊ីម៉ងត៍នោះ បានបញ្ជាឲ្យបើករថយន្តបំបុកសមត្ថកិច្ច និងថែមទាំងរកវាយសមត្ថកិច្ចទៀតផង។
ហេតុការណ៍ ដ៏ហួសចិត្តនេះ បានកើតឡើង កាលពីវេលាម៉ោង៣និង៣០នាទីរសៀលថ្ងៃទី២០ ខែឧសភា ឆ្នាំ២០២២ នៅចំណុចវត្តត្រពាំងឈូក ភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ រថយន្តក្រឡុកស៊ីម៉ងត៍ ពណ៌ស ពាក់ស្លាកលេខភ្នំពេញ 5A – 2216 ធ្វើដំណើរឆ្លងកាត់ពីក្នុងវត្តត្រពាំងឈូក ហើយមិនប្រយ័ត្ន បានទាក់ជាមួយខ្លោងទ្វារវត្តបណ្តាលឲ្យដួលរលំរងការខូចខាតទាំងស្រុង។ ភ្លាមៗនោះ សមត្ថកិច្ច ក៏បានចុះមកដល់ចំណុចកើតហេតុ ដើម្បីឲ្យភាគីរថយន្តបង្កសម្របសម្រួលជាមួយព្រះសង្ឃ។ បែរជាតៃកុងរថយន្តបើកចេញពីកន្លែងកើតហេតុ បម្រុងរត់គេចខ្លួនមិនទទួលខុសត្រូវ ។ ភ្លាមនោះសមត្ថកិច្ច ក៏បានឃាត់រថយន្ត តែត្រូវបានមេការក្រុមហ៊ុនរថយន្តខាងបញ្ជាអោយតៃកុងរថយន្តបើកបុកសមត្ថកិច្ចម្នាក់ តែមិនរងរបួសនោះទេទើបបង្កការភ្ញាក់ផ្អើល តែម្តង។
ប្រភពបន្តថា បន្ទាប់មកមេការក្រុមហ៊ុនរថយន្តបង្កនោះបានចុះមករកវាយសមត្ថកិច្ចទៀតផង ទើបសមត្ថកិច្ចប្រើធម៌ក្តៅចាប់វាយខ្នោះ នាំខ្លួនយកទៅអធិការនគរបាលខណ្ឌពោធិ៍សែនជ័យ ដើម្បីចាត់ការតាមនីតិវិធី៕
