ភ្នំពេញ៖ កាលពីថ្ងៃទី១៧ ខែឧសភា ឆ្នាំ២០២២ ម្សិលមិញនេះមានរឿងរ៉ាវដ៏រន្ធត់មួយបានកើតឡើង ខណៈតារាចម្រៀងកញ្ញា សុវត្ថិឌី ធារិកា បានបាត់បង់អ្នកមានគុណទាំង២ក្នុងគ្រោះថ្នាក់ចរាចរណ៍មួយបន្ទាប់ពីត្រឡប់មកពីបំពេញភារកិច្ចនៅខេត្តព្រះវិហារ។
យ៉ាងណាមិញរហូតមកដល់គេនៅមិនទាន់ដឹងច្បាស់ពីហេតុការណ៍ទេថា រថយន្តដែលបើកបរដោយឪពុករបស់សុវត្ថិឌី ធារិកា មានមូលហេតុអ្វីដែលបណ្តាលអោយក្រឡាប់ធ្លាក់ចូលប្រឡាយបែបនេះ ។
ប៉ុន្តែជាក់ស្ដែងបើយោងតាមឃ្លីបវីដេអូ ដែលត្រូវបានបង្ហោះដោយតារាសម្តែង នាង ដួង ម៉ានិច នោះ សុវត្ថិឌី ធារិកា បានរៀបរាប់ប្រាប់នាង និងអ្នកនាង ចន ច័ន្ទលក្ខិណាថា នាងស្ទើរមិនគួរជឿត្រឹមរយៈពេល៥នាទីនាងត្រូវបានបាត់បង់ឪពុកម្តាយបែបនេះឡើយ ។
នាងបញ្ជាក់ថា តាមពិតប្រសិនបើឪពុកម្តាយរបស់នាងមិនមានជំងឺប្រចាំកាយទេនោះទំនងជាអ្នកទាំងពីរអាចរួចផុតពីសេចក្តីស្លាប់បាន ។
នាងថា ឪពុកនាងមានជំងឺលើសឈាម ចំណែកម្តាយមានជំងឺបេះដូង ហេតុនេះក្រោយជួបហេតុការណ៍ដ៏រន្ធត់នេះ ពួកគាត់អាចសន្លប់ ហើយ ប្រសិនបើមិនអញ្ចឹងទេ ពួកគាត់អាចក្រោកចេញពីឡានដែលក្រឡាប់ធ្លាក់ទឹកនោះ ។ នាងបន្ថែមថា ពេលនោះនាងបានព្យាយាមជួយសង្គ្រោះឪពុកម្តាយដោយការផ្លំខ្យល់តាមមាត់ តែមិនអាចទៅរួច ខណៈពេលដែលក្រុមគ្រូពេទ្យមកដល់ក៏មិនមានឧបករណ៍គ្រប់គ្រាន់ ។
សុវត្ថិឌី ធារិកា បានលើកឡើងបន្ថែមថា តាមពិតក្រុមគ្រូពេទ្យបានបញ្ជាក់ថា ឪពុកម្តាយរបស់នាងបានផុតដង្ហើម មុនពេលបញ្ជូនមកដល់មន្ទីរពេទ្យមកម្ល៉េះ ។
សូមជម្រាបជូនផងដែរថា ហេតុការណ៍គ្រោះថ្នាក់ចរាចរណ៍នេះបានកើតឡើងនៅរសៀលថ្ងៃទី១៧ ខែឧសភា ឆ្នាំ២០២២ នៅម៉ោងជាង២រសៀល នៅស្រុកឆែប ខេត្តព្រះវិហារ។ ទន្ទឹមដំណឹងមរណទុក្ខនេះផងដែរគេឃើញមានសិល្បករទូទាំងប្រទេសបានបង្ហាញនូវការចូលរួមរំលែកទុក្ខ និងអារម្មណ៍ក្រៀមក្រំ។ ជាមួយគ្នានោះនៅពិធីបុណ្យសពដែលប្រារព្ធធ្វើនៅវត្តស្ទឺងមានជ័យ ក៏មានសិល្បកររង់ចាំទទួលសពទាំងយប់ផងដែរ ៕
