ចិន៖ កាលពីអំឡុងប៉ុន្មានខែមុននេះ អ្នកនិយមលេងបណ្ដាញសង្គមចិនបានផ្ទុះការចាប់ខ្លាំងទៅលើនិស្សិតស្រីបើកបរយន្តហោះចម្បាំងម្នាក់ ដោយសារតែនាងមិនត្រឹមតែមានសមត្ថភាពពិសេសប៉ុណ្ណោះទេ ថែមទាំងមានរូបសម្រស់ស្រស់ស្អាតផូផង់ មិនចាញ់តារាសិល្បៈប៉ុន្មានឡើយ ។
និស្សិតស្រីខាងលើមានឈ្មោះថា Han Jianing អាយុ២២ឆ្នាំ មានស្រុកកំណើតនៅខេត្ត Hainan ភាគខាងត្បូងនៃប្រទេសចិន ។ នាងត្រូវបានគេដឹងថា គឺជាយុវតីដំបូងគេបង្អស់នៅក្នុងខេត្ត Hainan ដែលស្ថិតក្នុងចំណោមនារីអាកាសយានិកយន្តហោះចម្បាំង ត្រូវបានបណ្តុះបណ្តាលដោយអង្គភាពកងទ័ពអាកាស PLA ។
យោងតាមបទសម្ភាសន៍ជាមួយសារព័ត៌មានក្នុងប្រទេស Han Jianing បានឱ្យដឹងថា ក្ដីស្រមៃតាំងពីតូចរបស់នាង គឺចង់ក្លាយជាអាកាសយានិកមួយរូប ។ ហើយទីបំផុតនៅឆ្នាំ ២០១៧ ក្នុងវ័យ ១៨ឆ្នាំ ពេលបញ្ចប់ថ្នាក់វិទ្យាល័យនៅសាលា Haikou នាងក៏បានសម្រេចក្ដីស្រមៃនោះ ដោយបានជាប់ចំណាត់ថ្នាក់លេខ០១ នៅក្នុងការប្រឡងជ្រើសរើសសិស្សវិទ្យាល័យចំនួន ១២ម៉ឺននាក់ ឱ្យចូលសិក្សាទៅលើជំនាញបើកបរយន្តហោះចម្បាំង របស់កងទ័ពរំដោះប្រជាជន (PLA) ។ នៅពេលប្រឡង ចូលរៀនបើកយន្តហោះចម្បាំងនោះ Han Jianing ត្រូវបានគេដឹងថានាងមានសមត្ថភាពខ្ពស់ ឆ្លាតវៃ និងលេចធ្លោជាងសិស្សដទៃទៀត ដូច្នេះហើយទើបកាលនោះ នាងទទួលបានពិន្ទុខ្ពស់រហូតដល់ ៦៦១ ,១០០ ពិន្ទុ លើសពីលក្ខខណ្ឌដែលគេត្រូវការនៅក្នុងការប្រឡងនោះ ។
ជាមួយគ្នានេះដែរ Han Jianing ក៏ត្រូវបានគេដឹងថា ជាមនុស្សស្រីដែលមានឆន្ទៈខ្ពស់ក្នុងការសិក្សាខ្លាំងបំផុត ។ ក្រៅពីនេះនាងក៏មានសមត្ថភាពពិសេសក្នុងការលេងឧបករណ៍តន្ត្រី Ukulele ស្គរ និងព្យាណូ រួមទាំងមានជំនាញក្នុងការសរសេរអក្សរផ្ចង់ចិនបានយ៉ាងល្អថែមទៀតផង ។
ដោយឡែកកាលពីនៅក្នុងវ័យ ២១ ឆ្នាំ Han Jianing រួមជាមួយមិត្តរួមថ្នាក់របស់នាង០៩នាក់ផ្សេងទៀតបានទទួលការអបអរសាទរមួយ សម្រាប់ការបញ្ចប់វគ្គនៃការហោះហើរទោលលើកដំបូងរបស់ពួកគេ នៅលើឧទ្ធម្ភាគចក្រធុនស្រាល Gazelle របស់ប្រទេសបារាំងដើម្បីអនុវត្តសមយុទ្ធសាមញ្ញមួយចំនួន ។
សូមបញ្ជាក់ថា បច្ចុប្បន្ននេះ Han Jianing កំពុងរៀនថ្នាក់មូលដ្ឋាន ដើម្បីបង្កើតមូលដ្ឋានគ្រឹះដ៏រឹងមាំមួយ សម្រាប់ពង្រឹងជំនាញបច្ចេកទេស រួមទាំងពង្រឹងសមត្ថភាពផ្លូវចិត្តរបស់នាងផងដែរ នេះបើយោងតាមសម្ដីគ្រូបើកយន្តហោះរបស់នាង ឈ្មោះលោក Wang Jianglin ៕