ភ្នំពេញ៖ កាលពីពេលម្សិលមិញនេះតារាចម្រៀងស្រីរបស់ផលិតកម្មរស្មីហង្សមាស សួស វីហ្សា បដិសេធថាខ្លួន និងស្វាមីមិនដែលស្គាល់ក្រុមជនសង្ស័យដែលបន្លំខ្លួនធ្វើជាមន្ដ្រីពន្ធដារនោះទេ ហើយស្នើឲ្យថ្នាក់ដឹកនាំ នៃអគ្គនាយដ្ឋានពន្ធដារដករូបនាងចេញពីក្រុមទាំងនោះ បើមិនដូច្នោះទេអ្នកនាងចេញមុខLive និយាយរឿងនេះរហូត។
ជាក់ស្ដែងកាលពីល្ងាចថ្ងៃទី១២ ខែឧសភា ឆ្នាំ២០២២ អ្នកនាង សួស វីហ្សា បានធ្វើការបង្ហោះសារមួយនៅលើផេកផ្លូវការរបស់ខ្លួនដោយបានសរសេររៀបរាប់ថា៖ «ក្មួយទាំងពីរសូមគោរពអរគុណដល់លោកពូនិងបងៗដែលបានជួយសំរួលនិងបានលុបរូបថតក្មួយទាំងពីរតាមសំណូមពរ ក្មួយសូមគោរពជូនពរលោពូនិងបងៗសូមជួបតែសេចក្តីសុខចំរេីន»។
គួរបញ្ជាក់ដែលថា ការដែលលេចមុខនាង និងស្វាមីនៅកណ្ដាលចំណោមជនសង្ស័យ ត្រូវបាន សួស វីហ្សា បកស្រាយថា រូបនាង និងស្វាមី បានទៅអង្គុយហូបគុយទាវនៅហាងមួយ ក្បែរព្រលានយន្ដហោះពោធិ៍ចិនតុង ហើយក៏លេចមុខក្រុមនោះមកសុំនាងថតជាមួយ ដោយនិយាយថា នាង និងស្វាមី គឺជាIdol របស់ពួកគេ ហើយនាងក៏យល់ព្រមឲ្យថតជាមួយ។ ដោយទីតាំងចង្អៀត ហើយមនុស្សច្រើន ក្រុមនោះក៏បានស្នើឲ្យរូបនាង និងស្វាមីឈរនៅចំកណ្ដាលពួកគេ ដើម្បីថតទុកជាអនុស្សាវរីយ៍តែម្ដងទៅ។
តារាស្រីរូបនេះ យល់ថា បើខាងអគ្គនាយកដ្ឋានពន្ធដារ មិនព្រមលប់រូបនេះចេញពីក្រុមជនសង្ស័យនោះទេ អាចធ្វើឲ្យមហាជន ជាពិសេសអ្នកគាំទ្រនាងយល់ច្រឡំ ដោយគិតថារូបនាង និងស្វាមីជាបក្សពួកជនសង្ស័យដែរ។ ប៉ុន្ដែតាមពិតទៅនាង និងស្វាមីមិនស្គាល់ជនទាំងនោះសោះ ហើយបើគេថាIdol ទៅហើយរូបនាងជាមនុស្សរបស់មហាជនទៀត បើមិនឲ្យគេថតជាមួយទៅក្លាយគេថាវាយរឹក ហើយពេលខ្លះអនុញ្ញាតឲ្យថតជាមួយទៅអាចមានរឿងដូចជាករណីនេះជាដើម។
គួររំលឹកដែលថា កាលពីថ្ងៃទី១២ ខែឧសភា អគ្គនាយកដ្ឋានពន្ធដារ បានចេញសេចក្តីជូនដំណឹងថា មានមនុស្សមួយក្រុមដែលក្នុងនោះបានប្រើប្រាស់ និងជាប់ពាក់ព័ន្ធនឹងគណនីក្នុងបណ្តាញទំនាក់ទំនងសង្គមហ្វេសប៊ុកដែលមានឈ្មោះ Thyrith Sochantha, Thirith Kong, ហម ផល្គុន និង Princess Small បានបង្ហោះក្នុងបណ្តាញសង្គមរបស់ខ្លួនដោយមានសកម្មភាពដូចជា៖ ស្លៀកពាក់ឯកសណ្ឋានដែលមានទម្រង់ជាមន្ត្រីរាជការពន្ធដារ, បង្ហោះរូបភាពក្នុងឯកសណ្ឋាន ឬមានពាក់កាតសម្គាល់អង្គភាពនៅមុខរដ្ឋបាលខេត្តមួយចំនួន ហើយគណនី Thyrith Sochantha និង Princess Small ក៏បានបង្ហាញក្នុងគណនីរបស់ខ្លួនថា កំពុងបម្រើការនៅអគ្គនាយកដ្ឋានពន្ធដារ។
ពាក់ព័ន្ធនឹងការលើកឡើងខាងលើ អគ្គនាយកដ្ឋានពន្ធដារ អគ្គនាយកដ្ឋានពន្ធដារ នៅថ្ងៃទី១២ ខែ ឧសភា ឆ្នាំ២០២២ បានប្រកាសជូនដំណឹងដល់សាធារណជន និងអ្នកជាប់ពន្ធ អោយបានជ្រាបថា មនុស្សមួយក្រុមនេះ មិនមែនជាមន្ត្រីរាជការពន្ធដារ ឬជាមន្ត្រីជាប់កិច្ចសន្យា នៃអង្គភាពក្រោមឱវាទ នៃអគ្គនាយកដ្ឋានពន្ធដារណាមួយឡើយ ។
ករណីនេះ គឺជាករណីប្រើប្រាស់ដោយខុសច្បាប់ នូវសម្លៀកបំពាក់ឯកសណ្ឋានសម្រាប់អាជ្ញាធរសាធារណៈ ដែលអគ្គនាយកដ្ឋានពន្ធដារ សង្ស័យថា ជាការប្រើប្រាស់សម្លៀកបំពាក់ និងឯកសណ្ឋានក្នុងគោលដៅទុច្ចរិតណាមួយ ដូចជាការក្លែងបន្លំ ឬឆបោក សាធារណជន ឬអ្នកជាប់ពន្ធ តាមរូបភាពណាមួយ ជាយថាហេតុ និងធ្វើឱ្យប៉ះពាល់យ៉ាងខ្លាំង នូវកិត្តិយស សេចក្តីថ្លៃថ្នូរ និងការបំពេញការងារស្របច្បាប់របស់ អគ្គនាយកដ្ឋានពន្ធដារ ។
បច្ចុប្បន្ន អគ្គនាយកដ្ឋានពន្ធដារបាន និងកំពុង សហការជាមួយអាជ្ញាធរមានសមត្ថកិច្ច និងស្ថាប័នពាក់ព័ន្ធ ដើម្បីចាត់វិធានការតាមច្បាប់ជាធរមាន ។
ក្នុងន័យនេះ អគ្គនាយកដ្ឋានពន្ធដារ សូមក្រើនរំលឹកជូនសាធារណជន និងអ្នកជាប់ពន្ធ សូមចៀសវាងការពាក់ព័ន្ធជាមួយមនុស្សមួយក្រុមនេះ ដើម្បីកុំឱ្យមានការឆបោកក្លែងបន្លំ ឬកេងប្រវ័ញ្ច ក្នុងរូបភាពណាមួយជាយថាហេតុ និងសូមលើកទឹកចិត្តដល់សាធារណជន និងអ្នកជាប់ពន្ធ ដែលទទួលបានព័ត៌មានពីការក្លែងបន្លំខាងលើ សូមរាយការណ៍មកអគ្គនាយកដ្ឋានពន្ធដារ តាមរយៈលេខទូរស័ព្ទ ១២៧៧ ៕
