រាជធានីភ្នំពេញ៖ រថយន្តកាមរីហាយប្រ៊ិកមួយគ្រឿង ពណ៌ស ពាក់ស្លាកលេខ នគរបាល 2-3882 បើកបរដោយបុរសម្នាក់ បានបោះពួយយ៉ាងលឿន ខ្វះការប្រុងប្រយ័ត្ន បានជ្រុលទៅបុករះកន្លែងលក់មីឆា និងបាយឆាមួយកន្លែង បណ្តាលឲ្យមនុស្សរងរបួស និងរងការខូចខាតសម្ភារ:ខ្ទេចខ្ទីអស់។
ករណីនេះ បង្កឲ្យមានការភ្ញាក់ផ្អើល កាលពីវេលាម៉ោង០១ និង៤០នាទីយប់រំលងអធ្រាត្រឈានចូលថ្ងៃទី២៦ ខែមករា ឆ្នាំ២០២២ មានករណីគ្រោះថ្នាក់ ស្ថិតតាមបណ្តោយផ្លូវវ៉េងស្រេង ក្នុងសង្កាត់ស្ទឹងមាន ជ័យទី៣ ខណ្ឌមានជ័យ រាជធានីភ្នំពេញ ។
សាក្សីបានឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាកកាមរីហាយប្រ៊ិក ពណ៌ស ពាក់ស្លាកលេខនគរបាល 2-3882 បើកបរដោយបុរសម្នាក់ បានបើកបរធ្វើដំណើរតាមបណ្តោយផ្លូវវ៉េងស្រេង នៅម្តុំលូប្រាំ ។ លុះពេលធ្វើដំណើរ មកដល់ត្រង់ចំណុចកើតហេតុខាងលើ បានបើកគេចរថយន្តកុងតឺន័រមួយគ្រឿង បណ្តាលឲ្យរេចង្កូតបុករះចូលទីតាំងកន្លែងលក់មីឆា និងបាយឆា បណ្តាលឲ្យមនុស្សរងរបួសស្រាលម្នាក់ និងរងការខូចខាតសម្ភារ:បែកបាក់ខ្ទេចខ្ទី និងរប៉ាត់រប៉ាយរាត់រាយពាសពេញ នៅទីតាំងកន្លែងលក់ដូរ ។
នៅក្រោយពេលកើតហេតុ កម្លាំងសមត្ថកិច្ចបាននាំខ្លួនតៃកុងរថយន្តបង្កហេតុ និងភាគីជនរងគ្រោះ ទៅកាន់ប៉ុស្តិ៍នគរបាលរដ្ឋបាល សង្កាត់ស្ទឹងមានជ័យទី៣ ដើម្បីធ្វើការដោះស្រាយគ្នាទៅតាមនីតិវិធីផ្លូវច្បាប់ ៕
