រដ្ឋធានីវ៉ាស៊ីនតោន៖ ស្របពេលស្ថានការណ៍វិបត្ដិ រវាងរុស្ស៊ី និង អ៊ុយក្រែន កាន់តែតានតឹងខ្លាំងឡើង ធ្វើឲ្យមានការព្រួយបារម្ភ អំពីការផ្ទុះសង្គ្រាមឡើង ហើយសហរដ្ឋអាមេរិក ក៏បានបញ្ជាឲ្យគ្រួសាររបស់បុគ្គលិកស្ថានទូតរបស់ខ្លួន ប្រចាំនៅក្នុងប្រទេសអ៊ុយក្រែន ត្រូវតែចាកចេញជាបន្ទាន់។
បើតាមសារព័ត៌មាន Al Jazeera បានចេញផ្សាយ កាលពីថ្ងៃទី២៣ ខែមករា ឆ្នាំ២០២២ ថា ក្រសួងការបរទេសសហរដ្ឋអាមេរិក បានបញ្ជាក់ នៅក្នុងសេចក្តីថ្លែងការណ៍មួយ ចេញផ្សាយ កាលពីថ្ងៃអាទិត្យ ទី២៣ ខែមករា ថា បុគ្គលិកស្ថានទូត ដែលមានតួនាទីមិនសំខាន់ អាចចាកចេញពីប្រទេសអ៊ុយក្រែន ក្រោមការចំណាយថវិការបស់រដ្ឋាភិបាលក្រុងវ៉ាស៊ីនតោន។ ចំណែកប្រជាជនអាមេរិកទាំងអស់ ក៏គួរតែពិចារណា ពីការចាកចេញជាបន្ទាន់ផងដែរ។ ចំណែកការចេញបទបញ្ជារបស់សហរដ្ឋអាមេរិក បែបនេះ បានកើតឡើង ចំពេលមានការព្រួយបារម្ភ កាន់តែខ្លាំងឡើង ពីរុស្ស៊ី កំពុងតែបញ្ជូនកងទ័ពកាន់តែច្រើនឡើង ទៅកាន់ព្រំដែន សម្រាប់ត្រៀមវាយលុក ចូលឈ្លានពានទៅលើប្រទេសអ៊ុយក្រែន។
សកម្មភាពយោធារបស់រុស្ស៊ី ជំរុញឲ្យក្រុងវ៉ាស៊ីតោន និងលោកខាងលិច មានការព្រួយបារម្ភកាន់តែខ្លាំងឡើង ថា រុស្ស៊ីកំពុងតែរៀបចំផែនការឈ្លានពានទៅលើប្រទេសអ៊ុយក្រែន ក្រោយការប្រើប្រាស់កម្លាំងយោធា រឹបអូសឧបទ្វីបគ្រីមៀ (Crimea) នៅក្នុងអំឡុងឆ្នាំ២០១៤ ដាក់បញ្ចូលទៅក្នុងដែនដីរបស់ខ្លួន។ ទោះជាយ៉ាងណា ក្រុងមូស្គូ បានលើកឡើងជាដដែលៗ ថា រុស្ស៊ី មិនមានគម្រោងឈានពានប្រទេសអ៊ុយក្រែននោះឡើយ។
ដោយឡែក ស្ថានទូតសហរដ្ឋអាមេរិក ប្រចាំនៅទីក្រុងគៀវ (Kyiv) បានព្រមានថា «សកម្មភាពយោធារបស់រុស្ស៊ី អាចនឹងកើតឡើងគ្រប់ពេល ហើយរដ្ឋាភិបាលសហរដ្ឋអាមេរិក នឹងមិនស្ថិតក្នុងស្ថានភាពមួយ សម្រាប់ជម្លៀសពលរដ្ឋអាមេរិក នៅក្នុងស្ថានភាពអាសន្ននោះដែរ។ ដូច្នេះពលរដ្ឋអាមេរិក ដែលមានវត្តមាន នៅក្នុងប្រទេសអ៊ុយក្រែន គួរតែរៀបចំផែនការចាកចេញជាបន្ទាន់»៕
