រាជធានីភ្នំពេញ ៖ បុរសម្នាក់បានបើករថយន្តសេរីទំនើបមួយគ្រឿងបោះពួយយ៉ាងលឿន ដោយមាននារីម្នាក់រួមដំណើរជាមួយផងដែរ ហើយខ្វះការប្រុងប្រយ័ត្នជ្រុលទៅបុករបាំងថ្មពុះចែកទ្រូងផ្លូវពេញទំហឹងបណ្ដាលរបាំងថ្មបាក់អស់៣កង់ ហើយរថយន្តក្រឡាប់ផ្ងារជើង ។
សាក្សីបានឱ្យដឹងថា មុនពេលកើតហេតុ គេឃើញរថយន្តស៊េរីទំនើបមួយគ្រឿងម៉ាកLEXUS GS300 ពណ៌ស បើកដោយបុរសម្នាក់រួមដំណើរជាមួយនារីម្នាក់សង្ស័យស្រវឹងស្រាធ្វើដំណើរពីត្បូងទៅជើងឡើងស្ពានអាកាសស្ទឹងមានជ័យក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើដោយស្ថានភាពផ្លូវកោងផងនោះបានជ្រុលចង្កូតទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឱ្យរបាំងថ្មបាក់អស់៣កង់ ឯរថយន្តបង្កក្រឡាប់ផ្ងារជើងឡើងលើច្រងាងៗ។ ភ្លាមៗនោះអ្នកបើកបរនិងអ្នករួមដំណើរបានលូនចេញពីរថយន្តដោះស្លាកលេខចេញ រួចរត់ចេញពីកន្លែងកើតហេតុ ។
ក្រោយកើតហេតុសមត្ថកិច្ច បានអន្តរាគមន៍ធ្វើការវាស់វែង និងកំណត់ហេតុ ស្ទូចយករថយន្តបង្កទៅរក្សាទុក ដើម្បីឲ្យម្ចាស់ចូលខ្លួនដោះស្រាយតាមផ្លូវច្បាប់៕
