រាជធានីភ្នំពេញ ៖ រថយន្តសង្គ្រោះបន្ទាន់របស់មន្ទីរសម្រាលព្យាបាល សុខ ហេង អង្គស្នួល បានបើកបរបញ្ច្រាសទិសដៅចរាចរណ៍ ក្នុងល្បឿនលឿន ហើយខ្វះការប្រុងប្រយ័ត្នជ្រុលទៅបុកម៉ូតូសិស្សសាលាយ៉ាងពេញ បណ្តាលឱ្យក្មេងប្រុសសិស្សសាលាម្នាក់រងរបួសធ្ងន់ ត្រូវបានរថយន្តសង្គ្រោះយកដឹកយកទៅសង្គ្រោះភ្លាម”។
ករណីគ្រោះថ្នាក់ចរាចរណ៍ដែលបង្កឡើងដោយរថយន្តរបស់មន្ទីរសម្រាលព្យាបាល សុខ ហេង អង្គស្នួល នេះ បានកើតឡើង កាលពីវេលាម៉ោង១១ព្រឹក ថ្ងៃទី១២ ខែមករា ឆ្នាំ២០២២ នៅចំណុចមុខប៉ុស្តិ៍នគរបាលរដ្ឋបាលកាកាបទី១ តាមបណ្តោយមហាវិថីសហព័ន្ធរុស្ស៊ី ក្នុងសង្កាត់កាកាបទី១ ខណ្ឌពោធិ៍សែនជ័យ ។
សាក្សី បានឱ្យដឹងថា មុនពេលកើតហេតុ គេបានឃើញក្មេងប្រុសសិស្សម្នាក់ជិះម៉ូតូម៉ាកហុងដាឃ្លីក ពណ៌ស ពាក់ស្លាកលេខ ភ្នំពេញ1IE -8061 ធ្វើដំណើរក្នុងទិសដៅពីកើតទៅលិច។ ខណៈមកដល់ចំណុចកើតហេតុស្រាប់តែមានរថយន្តមន្ទីរសម្រាកព្យាបាល សុខ ហេង អង្គស្នួល បានបើកបរបញ្ច្រាសទិសដៅចរាចរណ៍ប្រញាប់ដឹកអ្នកជំងឺម្នាក់ទៅមន្ទីរពេទ្យលោកសង្ឃ ហើយតែខ្វះការប្រុងប្រយ័ត្នបានបុកម៉ូតូពេញទំហឹង បណ្តាលឱ្យអ្នកជិះម៉ូតូរងរបួសធ្ងន់។
ប្រភពបន្តថា ក្រោយកើតហេតុ ជនរងគ្រោះត្រូវបានរថយន្តសង្គ្រោះរបស់មន្ទីរពេទ្យឯកជនមកទទួលយកទៅព្យាបាល ចំពោះអ្នកជំងឺនៅក្នុងរថយន្តមន្ទីរសម្រាកព្យាបាល សុខ ហេង អង្គស្នួល ត្រូវបានហៅរថយន្តមួយគ្រឿងទៀតមកបន្តយកទៅព្យាបាល។
សមត្ថកិច្ច បានឲ្យដឹងថា ក្រោយកើតហេតុ កម្លាំងសមត្ថកិច្ច ចុះអន្តរាគមន៍ធ្វើការវាស់វែង និងកំណត់ហេតុ យករថយន្តបង្ក និងម៉ូតូជនរងគ្រោះទៅរក្សាទុកបណ្តោះអាសន្ន ដើម្បីរង់ចាំដោះស្រាយជាមួយនឹងក្រុមគ្រួសារជនរងគ្រោះតាមផ្លូវច្បាប់៕