រាជធានីបាងកក៖ កំពូលអ្នកជំនាញខាងវីរុស ជនជាតិថៃ បានព្យាករថា វីរុសកូវីដ-១៩បំប្លែងខ្លួនថ្មីអូមីក្រុង (Omicron) អាចនឹងផ្ទុះការឆ្លងយ៉ាងខ្លាំង នៅក្នុងពេលដ៏ខ្លីខាងមុខនេះ។
សារព័ត៌មានថៃ The Nation បានចេញផ្សាយ នៅថ្ងៃទី២៧ ខែធ្នូ ឆ្នាំ២០២១ ថា លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ (Yong Poovorawan) អ្នកជំនាញកំពូលខាងវីរុស ជនជាតិថៃ បានសរសេរបង្ហោះ នៅលើបណ្ដាញសង្គមហ្វេសប៊ុក កាលពីថ្ងៃអាទិត្យ ទី២៦ ខែធ្នូ ថា វីរុសបំប្លែងខ្លួនថ្មី Omicron បានមកដល់ប្រទេសថៃ ហើយកំពុងតែឆ្លងរាតត្បាត។
លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ បានពន្យល់ថា ការព្រួយបារម្ភយ៉ាងខ្លាំងបំផុត គឺអ្នកដំណើរ ដែលបានធ្វើតេស្ដ រកឃើញអវិជ្ជមាន នៅក្នុងអំឡុងពេលវាភ្ញាស់ ហើយត្រូវបានអនុញ្ញាតឲ្យចូលមកក្នុងប្រទេសថៃ ក្រោមគម្រោង «The Test & Go »។ ករណីនេះ ពិតជាពិបាកខ្លាំង ក្នុងការកំណត់អត្តសញ្ញាណប្រភពដើម នៃការឆ្លងមេរោគ Omicron នៅក្នុងប្រទេសថៃ ដោយសារតែព្រឹត្តិការណ៍ជាច្រើន កំពុងតែប្រារព្ធឡើង ហើយវាអាចនាំឱ្យមានការឆ្លងវីរុសនេះ កាន់តែខ្លាំងឡើង។
លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ បានបញ្ជាក់ថា «រលក នៃការឆ្លងអូមីក្រុង នៅក្នុងប្រទេសថៃ គឺមិនហួសពីការរំពឹងទុករបស់យើង ព្រោះវាអាចឆ្លងយ៉ាងឆាប់រហ័ស សូម្បីតែអ្នកទទួលបានការចាក់វ៉ាក់សាំង ចំនួន២ដូសហើយក្ដី។ ដូច្នេះ ពលរដ្ឋគួរតែប្រកាន់ខ្ជាប់ខ្ជួននូវវិធានការនានា ដើម្បីទប់ស្កាត់នូវការឆ្លងរាតត្បាត ពីវីរុសនេះ។
លោកវេជ្ជបណ្ឌិត យ៉ុង ភូវ៉ូរ៉ាវ៉ាន់ បានទទួលស្គាល់ថា លោកពិតជាមានការព្រួយបារម្ភ ថា មនុស្សធ្វើដំណើរ នៅក្នុងអំឡុងពេលសម្រាកចូលឆ្នាំថ្មីនេះ វានឹងអាចធ្វើឱ្យ Omicron ឆ្លងរីករាលដាលបន្ថែមទៀត៕
