អង់គ្លេស៖ កាលពីពេលថ្មីៗនេះអង្គការសុខភាពពិភពលោក (WHO) បានជំរុញឲ្យប្រជាជនទូទាំងពិភពលោកធ្វើការលុបចោលគម្រោងដើរកម្សាន្តថ្ងៃឈប់សម្រាកខ្លះ ដើម្បីការពារសុខភាពសាធារណៈ ដោយ WHO បានសង្កត់ធ្ងន់ថា «ការលុបចោលព្រឹត្តិការណ៍មួយប្រសើរជាងការលុបចោលជីវិត ការសម្រេចចិត្តដ៏លំបាកត្រូវតែធ្វើ» ខណៈដែលវីរុសបំប្លែងថ្មីបានរាតត្បាតជុំវិញពិភពលោក។
ភ្លាមៗនោះក្រោយពីលោក Tedros Adhanom Ghebreyesus ប្រធានអង្គការសុខភាពពិភពលោក បានថ្លែងបាននេះ ព្រះមហាក្សត្រិយានី អេលីហ្សាបែត II បានសម្រេចលុបចោលព្រះរាជពិធីប្រពៃណីបុណ្យណូអែល នៅក្នុងព្រះដំណាក់ Sandringham នៅក្នុងឆ្នាំនេះ ប៉ុន្ដែព្រះមហាក្សត្រិយានី នឹងចំណាយពេលប្រារព្ធពិធីនេះ នៅក្នុងព្រះដំណាក់ Windsor Castle ជាកន្លែងដែលព្រះរាជវង្សានុវង្ស អាចចូលគាល់ព្រះមហាក្សត្រិយានី។
សូមរម្លឹកថា វីរុសបំប្លែងថ្មី ត្រូវបានអ្នកវិទ្យាសាស្ត្រអាហ្វ្រិចខាងត្បូងរាយការណ៍ទៅកាន់អង្គការសុខភាពពិភពលោកកាលពីថ្ងៃទី ២៤ ខែវិច្ឆការ។ រហូតមកដលពេលនេះ វីរុសបំប្លែងថ្មីនេះបានធ្វើដំណើរទៅដល់ប្រទេសជាង៨០ជុំវិញពិភពលោក រួមទាំងប្រទេសកម្ពុជា និងថៃផងដែរ ៕