រាជធានីភ្នំពេញ៖ ប្រិយមិត្តប្រាកដជាបានជ្រាប់ច្បាស់ហើយពីករណីលោក សុខសុវណ្ណ វឌ្ឍនាសាប៊ុង ហៅ William Guang ប្រធានគណបក្សខ្មែរក្រោក ដែលជា «មេខ្លោង» រៀបចំផែនការ និងបានដឹកនាំផ្ទាល់ទៅប្លន់ផ្ទះ ឧកញ៉ា អ៊ាន សៀវម៉ី ហើយពេលនេះត្រូវបានសមត្ថកិច្ចឃាត់ខ្លួនបានជាស្ថាពរ ដោយប្រមូលបានគ្រឿងពេជ្រត្រឡប់មកវិញ និងដកហូតអាវុធចំនួន5ដើម(វែង១ដើម ខ្លី៤ដើម) ព្រមទាំងឃាត់ខ្លួនមនុស្សពាក់ព័ន្ធ បានចំនួន១២នាក់(ប្រុស៩នាក់ ស្រី៣នាក់) ទៀតផង។
យ៉ាងណាមិញមានបងប្អូនជាច្រើននៅពុំទាន់ស្គាល់ថាលោក វីល្លៀម គ័ង ជាអ្នកណា មានប្រភពមកពីណាប្រវត្តិការសិក្សា គ្រួសារ មុខជំនួញ បែបណា ដូច្នេះថ្ងៃនេះ KBN នឹងធ្វើការសង្ខបខ្លីៗត្រួសៗពីប្រវត្តិលោក វីល្លៀម គ័ង ដូចខាងក្រោម៖
William Guang (ឈ្មោះពិត លោក សុវណ្ណវនា សារពង្ស) មានដើមកំណើតនៅខេត្តបាត់ដំបង បច្ចុប្បន្ននេះលោកមានអាយុ៤០ឆ្នាំហើយ ខណៈរូបលោកនៅពុំទាន់មានគ្រួសារនៅឡើយទេ។ កន្លងមកដោយលោកធ្លាប់បានលើកឡើងថា ម្តាយលោកបានស្លាប់ក្រោយបង្កើតលោកបាន ៧ថ្ងៃក្នុងសម័យប៉ុលពត ហើយក្នុងឆ្នាំ ១៩៨២ ក្រោយរំដោះរបបនោះ ឱពុកលោកបានលាចាកលោកទៀត ដូច្នេះលោកត្រូវរស់នៅជាមួយពូបង្កើត។
ប៉ុន្តែនៅឆ្នាំ១៩៨៨ ដោយសារជំនួញរបស់ពូលោកខ្ស័យធន់ហើយរត់ទៅបរទេស លោក វីល្លៀម គ័ង ក៏បានរស់នៅតែម្នាក់ឯងគ្មានបងប្អូន ដោយការអាស្រ័យខ្លួននៅវត្តនិរោធ។ អំឡុងពេលលោករៀនសាកលវិទ្យាល័យ គឺជាពេលដែល វីល្លៀម លំបាកបំផុត ព្រោះគ្មានប្រាក់ ដូច្នេះត្រូវបង្ខំចិត្តទៅធ្វើអ្នករត់តុនៅរង្គសាល នាគព័ន្ធ ហើយឆ្លៀតពេលទំនេរទៅធ្វើសំណង់ រៀបឥដ្ឋរកប្រាក់បន្ថែមដើម្បីរៀនសូត្រ ហើយក្រោយពីនោះបានទៅសម្រាកនៅវត្ត។
មួយថ្ងៃៗកាលជំនាន់នៅរៀន លោកសឹងតែរកពេលសម្រាកគ្មាន ពោលគឺសម្រាកបានតែ ៣ម៉ោងគត់ ដោយសារលោកធ្វើការចាប់ពីម៉ោង ៦យប់ដល់ម៉ោង ៣ភ្លឺរាល់ថ្ងៃ។ បន្ថែមពីនោះលោកបានរៀនសរសេរអត្ថបទស៊ីជម្រៅដើម្បីលក់ឲ្យកន្លែងនិពន្ធសៀវភៅ រកប្រាក់បន្ថែមទៀត។
លោកក៏ជាអ្នករកសុីអចលនទ្រព្យដ៏ល្បីល្បាញមួយរូប និងក៏ជាសេដ្ឋីមានទ្រព្យ ព្រមទាំងផ្ទះវិឡាខ្នាតធំមួយរូបផងដែរ ហើយអ្វីដែលជាពិសេសទៅទៀតនោះ លោកក៏ជាអ្នកនយោបាយ និងក៏ជាប្រធានគណបក្សមួយរូបថែមទៀត ខណៈការឈានជើងចូលក្នុងនយោបាយនេះគឺលោកបានទទួលប្រជាប្រិយភាពពីពលរដ្ឋគ្រប់បណ្ដាខេត្ត ដោយសារគេសង្កេតឃើញលោកតែងតែមានសកម្មភាពយ៉ាងសស្រាក់សស្រាំក្នុងការជួយយកទុក្ខធុរៈរបស់ប្រជាពលរដ្ឋគ្រប់បណ្ដាខេត្ត។
យ៉ាងណាមិញនេះគឺគ្រាន់តែជាប្រវត្តិរបស់លោក វីល្លៀម គ័ង ធ្លាប់បានលើកឡើងកាលពីគ្រាកន្លងតែប៉ុណ្ណោះ ប្រវត្តិច្បាស់ មិនច្បាស់យ៉ាងណា KBN នឹងធ្វើការខិតខំស្រាវជ្រាវដើម្បីរកព័ត៌មានបន្ថែមក្នុងការចុះផ្សាយជូនប្រិយមិត្តឲ្យបានជ្រាបកាន់តែច្បាស់បន្តទៀត ៕