ភ្នំពេញ៖ ដូចដែលទស្សនិកជនបានជ្រាបរួចមកហើយថា នៅក្នុងកម្មវិធី Beat The Best វគ្គ Beat The Judges សប្ដាហ៍ទី ៣ នេះ កញ្ញា លី លីនដា គឺជាបេក្ខនារីដ៏លេចធ្លោមួយរូបក្នុងចំណោមបេក្ខជន បេក្ខនារីខ្លាំងៗជាច្រើននាក់ ។ កញ្ញា លី លីនដា បានបកស្រាយបទចម្រៀងជាភាសាបរទេសមានចំណងជើងថា «Halo» បានយ៉ាងល្អឥតខ្ចោះ រហូតទទួលបានពាក្យ “អាច” ពីគណៈកម្មការទាំង ៤រូប ។
ក្នុងជំនួបតាមរយៈទូរស័ព្ទជាមួយ KBN កញ្ញា លី លីនដា បានប្រាប់ថា បើទោះជាកញ្ញាអាចបកស្រាយបទចម្រៀងយ៉ាងពីរោះយ៉ាងណាក៏ដោយ មិនមែនមានន័យថាកញ្ញាធ្លាប់មានបទពិសោធន៍ឆ្អិនឆ្អៅទៅលើវិស័យចម្រៀងឡើយ ពោលគឺកញ្ញាជាអ្នករកស៊ី ប៉ុន្តែគ្រាន់តែមានដុងច្រៀង និងស្រឡាញ់អាជីពជាអ្នកចម្រៀងតាំងពីតូចមកម្ល៉េះ ។ ហើយម្ដងម្កាល កញ្ញា ក៏បានឡើងបកស្រាយបទចម្រៀងនៅពេលជួបជុំមិត្តភក្ដិ ដើម្បីការកម្សាន្តប៉ុណ្ណោះ ។
ទាក់ទងនឹងសមត្ថភាពអាចបកស្រាយបទចម្រៀងជាភាសារបរទេសបានល្អ ដូចជនជាតិដើមយ៉ាងsដូច្នេះ ស្រីស្រស់ លី លីនដា ក៏បានឱ្យដឹងផងដែរថា ដោយសារកញ្ញា ជានិសិស្សឆ្នើមមួយរូបកាលពីនៅសិក្សាថ្នាក់បរិញ្ញាប័ត្រ ដូច្នេះទើបមានឱកាសបានទទួលអាហាររូបករណ៍ទៅសិក្សារយៈពេលខ្លីនៅសហរដ្ឋអាមេរិក មិនតែប៉ុណ្ណោះសូម្បីតែការសិក្សានៅមហាវិទ្យាល័យក្នុងស្រុក ក៏កញ្ញាជានិស្សិតអាហាររូបករណ៍មួយរយភាគរយផងដែរ ។
បេក្ខនារីឆ្នើមក្នុងកម្មវិធី Beat The Best វគ្គ Beat The Judges រូបនេះបានបញ្ជាក់ផងដែរថា ដោយសារតែខ្លួនជាអតីតសិស្សឆ្នើម ថែមទាំងបានមានឱកាសទទួលអាហារូបករណ៍នៅសហរដ្ឋអាមេរិកទៀតនោះ ទើបឪពុកម្ដាយ ក្រុមគ្រួសារ មិនចង់ឱ្យកញ្ញាប្រឡូកក្នុងការងារសិល្បៈដោយចង់ ដោយឱ្យផ្ដោតទៅលើការងារជាអ្នកជំនួញ ឬជាពាណិជ្ជករវិញ ដូច្នេះហើយបច្ចុប្បន្នកញ្ញា កំពុងកាន់កាប់មុខរបរធំៗផ្ទាល់ខ្លួនចំនួន ០២ ក្នុងដៃគឺក្រុមហ៊ុន «DAPRO Trading co,ltd »និងមជ្ឈមណ្ឌលថែរក្សាសម្រស់ដ៏ធំ និងល្បីឈ្មោះគឺ «ចែស្អាត» ដែលបច្ចុប្បន្នមាន ២សាខាធំៗ ។
