ខេត្តកំពត៖ កាលពីពេលថ្មីៗនេះមានករណីគ្រោះថ្នាក់ចរាចរណ៍យ៉ាងរន្ធត់មួយដែលមានក្មេងសិស្សសាលាជិះម៉ូតូ២គ្រឿង ចេញមកពីរៀនគួរពេលយប់ ត្រូវរថយន្តរេចង្កូតបុករះពេញទំហឹង បណ្តាលឱ្យក្មេង៤នាក់ ស្លាប់នៅកន្លែងកើតហេតុភ្លាមៗ។
ហេតុការណ៍នេះ បានកើតឡើង នៅវេលាម៉ោង ៥ និង ៣០ នាទីល្ងាចកាលពីថ្ងៃទី ០១ ខែធ្នូ ឆ្នាំ ២០២១ ស្ថិតក្នុងភូមិទូកមាស ឃុំទូកមាសខាងលិច ស្រុកបន្ទាយមាស ខេត្តកំពត លើដងផ្លូវជាតិលេខ ៣១។
រហូតមកដល់ពេលនេះគឺមានរយៈពេលជាងកន្លះខែហើយ ដែលជនបង្ករនៅពុំទាន់ចូលខ្លួនមកដោះស្រាយតាមផ្លូវច្បាប់នៅទង្វើដែលខ្លួនបានប្រព្រឹត្ត ខណៈមានពលរដ្ឋដែលប្រទះឃើញហេតុការណ៍គ្រោះថ្នាក់ចរាចរណ៍នេះបានបង្ហើបឲ្យដឹងថា ជនបង្ករដែលបើករថយន្ដបុកក្មេងសិស្សសាលាទាំង៤នាក់ បណ្ដាលឲ្យស្លាប់នោះ គឺបើកបរក្នុងស្ថានភាពស្រវឹង ហើយជនបង្ករគឺជាមនុស្សដែលមានចំណេះដឹងជ្រៅជ្រះ មានការងារខ្ពង់ខ្ពស់ ព្រមទាំងមានយស់ស័ក្ដិនៅក្នុងសង្គមទៀតផង ប៉ុន្តែបែរជាគ្មានការទទួលខុសត្រូវនៅក្នុងខ្លួន ហើយព្យាយាមរត់គេចពីសំណាញ់ច្បាប់ ដែលបានធ្វើឲ្យបងប្អូន ឪពុក ម្ដាយ ជនរងគ្រោះមានការក្ដៅក្រហាយ ខឹងសម្បារ ហើយស្ទើរតែជារៀងរាល់ថ្ងៃពួកគាត់តែងតែដង្ហោយឲ្យច្បាប់ ឬក៏អាជ្ញាធរពាក់ព័ន្ធ សូមមេត្តាជួយរកពន្លឺយុត្តិធម៌ឲ្យអ្នកស្លាប់បានបិទភ្នែកជិតផង។ នេះបើយោងតាមការបញ្ជាក់របស់គណនីហ្វេសប៊ុក Savin Tren ដែលជាម្ដាយជនរងគ្រោះបានឲ្យដឹងយ៉ាងដូច្នេះថា៖«ឃាតករសម្លាប់កូនសិស្ស៤នាក់ មិនទទួលខុសត្រូវចំពោះមុខច្បាប់ហើយមានការងារជាអ្នកកាន់ច្បាប់ សូមអ្នកកាន់យុត្តិធម៌រកយុត្តិធម៌អោយខ្ញុំផង(ខ្ញុំអ្នកខេត្តកំពត)»។
គួររំលឹកដែលថា យោងតាមប្រភពព័ត៌មាននៅកន្លែងកើតហេតុបានឱ្យដឹងថា មុខពេលកើតរឿងដ៏អាក្រក់នេះ គេឃើញរថយន្តប្រភេទធុនធ្ងន់(ពោងស៊ីម៉ងត៍)បានធ្វើដំណើរពីជើងទៅត្បូង ហើយរថយន្តនោះបានវាជែងម៉ូតូសិស្សសាលា២គ្រឿង ដែលបើកបរស្របគ្នា គាប់ជួនមានរថយន្តម៉ាកម៉ាស្តាមួយគ្រឿង ដែលបោះពួយមកពីត្បូងទៅជើងក្នុងទិសដៅបញ្ច្រាស់ បានមកដល់វាក់អើ ទើបគេចគ្នាមិនផុត រថយន្តទាំងពីរគ្រឿងក៏ប៉ះទង្គិចគ្នាប្រាវ ហើយរថយន្តម៉ាស្តារេចង្កូចជ្រុលទៅបុករះម៉ូតូសិស្សសាលា ២ គ្រឿង ដែលមានមនុស្ស ៤ នាក់ បណ្តាលឱ្យអ្នកបើកម៉ូតូ និងអ្នករួមដំណើរស្លាប់ដេកពេញផ្លូវតែម្តង។
ជុំវិញករណីគ្រោះថ្នាក់ចរាចរខាងលើ សមត្ថកិច្ចមូលដ្ឋានបានឱ្យដឹងថា អ្នកស្លាប់ក្នុងហេតុការណ៍នោះ សុទ្ធតែជាក្មេងសិស្សសាលា ដោយជនរងគ្រោះទាំង ៤ នាក់ ជិះម៉ូតូ២គ្រឿង ទី១. ឈ្មោះលី ជីអ៊ិន ភេទប្រុស អាយុ ១៦ ឆ្នាំ, ទី២. ឈ្មោះ យុ មេត្តា ភេទប្រុស អាយុ ១៥ ឆ្នាំ (ជិះម៉ូតូស្កុបពី)ជនរងគ្រោះទាំងពីរនាក់ មានទីលំនៅភូមិកន្លង់ ឃុំស្តេចគង់ខាងជើង ស្រុកបន្ទាយមាស ខេត្តកំពត,ទី៣. ឈ្មោះ ផាត់ ចំរើន ភេទប្រុស អាយុ ១៦ ឆ្នាំ មានទីលំនៅភូមិដើមចំរៀក ឃុំស្តេចគង់ខាងលិច ស្រុកបន្ទាយមាស និងទី៤. ឈ្មោះ ឈាង បញ្ញា ភេទប្រុស អាយុ ១៥ ឆ្នាំ មានទីលំនៅភូមិឈើទាល ឃុំស្តេចគង់ខាងលិច ស្រុកបន្ទាយមាស ខេត្តកំពត ជនរងគ្រោះទាំងពីរជិះម៉ូតូម៉ាក C125 ពណ៌ខ្មៅ ផលិតឆ្នាំ ២០១៧ ៕