រដ្ឋធានីហាណូយ៖ ថ្វីបើប្រទេសវៀតណាម បានរងគ្រោះយ៉ាងធ្ងន់ធ្ងរ ពីរលកកូវីដ-១៩ចុងក្រោយក្ដី ប៉ុន្ដែតម្លៃអចលនទ្រព្យរបស់ប្រទេសអាស៊ានមួយនេះ កំពុងតែកើនឡើងថ្លៃ ខណៈតម្លៃផ្ទះល្វែង ឬអាផាតមិនមួយចំនួន កើនតម្លៃរហូតដល់៥០០ ០០០ ០០០ដុង (លុយវៀតណាម) ស្មើនឹង ២២ ៩៤៦ដុល្លារសហរដ្ឋអាមេរិក នៅក្នុងរយៈពេលប៉ុន្មានខែ កន្លងមកនេះ។
បើតាមសារព័ត៌មាន Vietnam Net បានចេញផ្សាយ កាលពីព្រឹក ថ្ងៃទី៣ ខែធ្នូ ឆ្នាំ២០២១ ថា អ្នកស្រី Minh Hanh និង ប្ដីរបស់អ្នកស្រី មកពីខេត្ត Hung Yen ។ ប៉ុន្ដែក្រោយពេលបើកអាជីវកម្ម អស់រយៈពេល៥ឆ្នាំ នៅក្នុងទីក្រុងហាណូយ រួចមក ពួកគាត់មានបំណងចង់បានផ្ទះសម្បែងមួយខ្នង ដើម្បីតាំងលំនៅ នៅក្នុងស្រុក Long Bien ព្រោះតម្លៃផ្ទះ នៅតំបន់នេះ មិនខ្ពស់ ដូចជា នៅតាមទីរួមស្រុកផ្សេងៗទៀត ហើយហេដ្ឋារចនាសម្ព័ន្ធ នៅទីនោះ ក៏ពួកគាត់ពេញចិត្តផងដែរ។
នៅដើមឆ្នាំ២០២១ សាច់ញាតិរបស់អ្នកស្រី Hanh បានទិញផ្ទះកម្ពស់៤ជាន់ លើដីទំហំ៣0 ម៉ែត្រការ៉េ នៅតាមផ្លូវតូច Bo De ក្នុងតម្លៃ ២,២ពាន់លានដុង ឬស្មើនឹង៩៧ ០០៣ដុល្លារសហរដ្ឋអាមេរិក។ ផ្ទះតូចៗ សម្រាប់គ្រួសារតូច មានសមាជិក៤នាក់ នៅក្នុងមូលដ្ឋាន មានតម្លៃជាមធ្យម ចន្លោះពី ២,២ ទៅ ២,៧ពាន់លានដុង ឬស្មើនឹងចន្លោះពី ៩៧ ០០៣ដុល្លារ ទៅ ១១៩ ០៤៩ដុល្លារសហរដ្ឋអាមេរិក។
ក្រសួងសំណង់វៀតណាម បានបញ្ជាក់ នៅក្នុងរបាយការណ៍ នៅត្រីមាសទី៣របស់ខ្លួន ថា ទីផ្សារអចលនទ្រព្យ បានបង្ហាញថា ប្រតិបត្តិការអចលនទ្រព្យ ត្រូវបានរងផលប៉ះពាល់ ក្នុងអំឡុងពេលមានវិបត្ដិជំងឺរាតត្បាត ដោយសារអ្នកទិញ និងអ្នកលក់ មិនអាចជួបគ្នាបាន ចំពេលមានការបិទខ្ទប់ ទប់ស្កាត់ជំងឺដ៏កាចសាហាវនេះ។ ប៉ុន្ដែទោះជាយ៉ាងណា តម្រូវការ នៅតែកើនតឡើង ហើយវិនិយោគិន កំពុងតែបង្កើនការខិតខំប្រឹងប្រែង ដើម្បីបង្កើនការលក់ ដូរ ព្រោះវិស័យនេះ នឹងមានភាពល្អប្រសើរឡើងវិញ៕