រាជធានីភ្នំពេញ៖ លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា ហៅកាត់ថាស៊ីម៉ាក់ បានឲ្យដឹងថា មន្ត្រីអង្គភាពស៊ីម៉ាក់ចំនួន៣រូបបាននិងកំពុងបំពេញបេសកកម្មហ្វឹកហ្វឺនកំលាំងជំនាញវិស័យមីននៅប្រទេសកូឡុំប៊ីដែលភាគច្រើនជាកងទ័ពកូឡុំប៊ី។
តាមរយៈបណ្ដាញសង្គមហ្វេសប៊ុក លោក ហេង រតនា បានបញ្ជាក់ថា ប្រទេសកូឡុំប៊ីនៅតំបន់អាមេរិកខាងត្បូង មានប្រជាជនជាង៥០លាននាក់ បន្តសង្គ្រាមស៊ីវិលជាង៥៧ឆ្នាំ ជារៀងរហូតមកដល់បច្ចុប្បន្ននេះ។
លោកបន្តថា ប្រទេសកូឡុំប៊ីស្ថិតនៅម្ខាងនៃផែនដីគិតពីកម្ពុជា មានចំងាយជាង១៨,០០០គីឡូម៉ែត្រ ជិះយន្តហោះប្រមាណជាង២០ម៉ោង។ ខ្ញុំមានមោទនភាពជាមួយមន្ត្រីជំនាញដែលបានខិតខំបំពេញភារកិច្ចនេះ។
លោក ហេង រតនា បញ្ជាក់បន្ថែមថា នេះជាសមិទ្ធិផលនៃសហប្រតិបតិ្តការត្បូង-ត្បូងដែលគាំទ្រដោយរដ្ឋាភិបាល ជប៉ុនតាមរយៈJICA!។ អង្គភាពស៊ីម៉ាក់ក៏ធ្លាប់មានកិតិ្តយសទទួលស្វាគមន៍ អតីត:ប្រធានធិបតីកូឡុំប៊ី នៅពេលអញ្ជើញមកទស្សនកិច្ច ការងារនៅកម្ពុជាផងដែរ៕