ខេត្តកណ្តាល ៖ បុរសម្នាក់បានលង់ទឹកស្លាប់ ខណៈដែលបើករថយន្តដឹកសម្ភារៈមេបូជាសពឆ្លងទូកដ តែជួបនឹងខ្យល់បក់ខ្លាំង បណ្តាលឲ្យក្រឡាប់ទូកដលិចក្នុងទឹកតែម្តង ដែលហេតុការណ៍នេះ បានកើតឡើង កាលពីវេលាម៉ោង០៥ និង៣០នាទីព្រឹក ថ្ងៃទី២៦ ខែវិច្ឆិកា ឆ្នាំ២០២១ នៅចំណុចស្ទឹងក្រោយវត្តទួលស្លែង ប្រហែល២០០ម៉ែត្រ ស្ថិតនៅក្នុងភូមិទួលស្លែង ឃុំលើកដែក ស្រុកកោះធំ ខេត្តកណ្ដាល។
តាមប្រភពពីកន្លែងកើតហេតុ បានឲ្យដឹងថា ករណីនេះ ដោយសារជនរងគ្រោះធ្វេសប្រហែស ខ្វះការប្រុងប្រយ័ត្ន មិនស្ដាប់តាមការណែនាំរបស់អ្នកបើកទូកដ ឲ្យរុះរើសម្ភារៈចុះខ្លះ ព្រោះចម្លងខ្លាចក្រែងមានឧបសគ្គ ដូចការរៀបរាប់ខាងលើ តែជនរងគ្រោះមិនស្ដាប់ ហើយចចេសមិនធ្វើតាម ដោយអះអាងថាខ្លួន ប្រញាប់ទៅរៀបចំសង់មេនបូជាសពឲ្យគេ ហើយបង្ខំឲ្យអ្នកបើកទូកដចេញដំណើរ ទើបគ្រោះថ្នាក់បែបនេះទៅ។
សមត្ថកិច្ច បញ្ជាក់ថា ករណីនេះ ប្រពន្ធជនរងគ្រោះមិនប្ដឹងផ្ដល់ទាមទារលើភាគីណាទេ ដោយសារប្ដីខ្លួនបើកបរធ្វេសប្រហែសដោយខ្លួនឯង។ ណាមួយទូកដជារបស់វត្ត ចម្លងមិនបង់ប្រាក់ និយាយរួម គឺសម្រាបប់ចម្លងប្រជាពលរដ្ឋ ដោយគ្រាន់តែសុំសម្ភារៈ និងយកសពប្តីទៅធ្វើបុណ្យតាមប្រពៃណីប៉ុណ្ណោះ ៕
ចង់ជ្រាបកាន់តែច្បាស់ សូមប្រិយមិត្តទស្សនាវីដេអូដូចខាងក្រោម៖
