រាជធានីតូក្យូ៖ ស្របគ្នានឹងបម្រាមរបស់ប្រទេសសិង្ហបុរី និងបណ្ដាប្រទេសនានានោះ ជប៉ុន កាលពីថ្ងៃទី២៦ ខែវិច្ឆិកា ឆ្នាំ២០២១ ក៏នឹងដាក់បម្រាមដល់អ្នកធ្វើដំណើរ មកពីប្រទេសចំនួន៦ នៅទ្វីបអាហ្វ្រិក ដោយសារតែប្រទេសទាំងនោះ មានការចរាចរណ៍នូវវីរុសបំប្លែងថ្មីដ៏កាចសាហាវខ្លាំងបំផុត ដែលលេខសម្គាល់ B.1.1.529 ត្រូវបានរកឃើញ នៅប្រទេសអាហ្វ្រិកខាងត្បូង។
សារព័ត៌មានជប៉ុន NHK បានចេញផ្សាយ នៅថ្ងៃទី២៧ ខែវិច្ឆិកា ឆ្នាំ២០២១ ថា បណ្ដាប្រទេស និង តំបន់ជាច្រើន នៅទូទាំងពិភពលោក កំពុងតែរឹតបន្ដឹងព្រំដែនរបស់ខ្លួនឡើងវិញ ក្រោយការរកឃើញវីរុសបំប្លែងខ្លួនថ្មី ដែលឆ្លងលឿន មានប្រភព នៅប្រទេសអាហ្វ្រិកខាងត្បូង។ រីឯប្រទេសជាសមាជិកសហភាពអឺរ៉ុប បានព្រមព្រៀង ដាក់កំហិតការថ្វើដំណើរ មកពីប្រទេសចំនួន៧ នៅតំបន់ភាគខាងត្បូង នៃទ្វីបអឺរ៉ុប រួមមាន ប្រទេសអាហ្វ្រិកខាងត្បូង, ប៊ូស្វាណា (Botswana) ណាមីបៀ (Namibia) និង មូហ្សាមប៊ីក (Mozambique) ជាដើម។
វីរុសបំប្លែងខ្លួនថ្មី ក៏បានរកឃើញ នៅក្នុងប្រទេសអ៊ីស្រាអែល និង នៅហុងកុង។ ចំណែកអាជ្ញាធរ នៃប្រទេសទាំងនោះ ក៏បានដាក់បម្រាមចូលមកក្នុងប្រទេសរបស់ខ្លួន សម្រាប់អ្នកដំណើរ ដែលមានប្រវត្ដិថ្មីៗនេះ ធ្វើដំណើរទៅកាន់ប្រទេសអាហ្វ្រិកទាំអស់ លើកលែងតំបន់អាហ្វ្រិកខាងជើង។
បើតាមបណ្ដាញសារព័ត៌មានអន្ដរជាតិ បានផ្សាយថា ប្រទេសមួយចំនួន នៅអាស៊ី និង មជ្ឈិមបូព៌ា រួមមាន សិង្ហបុរី ហ្វីលីពីន អារ៉ាប៊ីសាអូឌីត និងបារ៉ែន នឹងដាក់កំហិតដល់អ្នកធ្វើដំណើរមកពីប្រទេសអាហ្វ្រិកខាងត្បូង និង បណ្ដាប្រទេស នៅជុំវិញប្រទេសនេះផងដែរ។
ជាមួយគ្នានេះ អាជ្ញាធររុស្ស៊ី បានបញ្ជាក់ថា ខ្លួន នឹងណែនាំឲ្យមានការរឹតបណ្ដឹងការធ្វើដំណើរ សម្រាប់ជនបរទេសនានា មកពីប្រទេសនានា នៅទ្វីបអាហ្វ្រិក ក៏ដូចជា ហុងកុង ផងដែរ។
អ្នកនាំពាក្យ រដ្ឋាភិបាលជប៉ុន បានបញ្ជាក់ កាលពីថ្ងៃសុក្រ ទី២៦ ខែវិច្ឆិកា ឆ្នាំ២០២១ ថា ជប៉ុននឹងរឹតបន្តឹងដល់អ្នកធ្វើដំណើរ មកពីប្រទេសចំនួន៦ នៅទ្វីបអាហ្រ្វិក។ ការហាមឃាត់ដល់អ្នកដំណើរបែបនេះ បានកើតឡើង ក្រោយពេលវីរុសបំប្លែងខ្លួនថ្មី B.1.1.529 ត្រូវបានរកឃើញ នៅ ប្រទេសអាហ្វ្រិកខាងត្បូង ហើយវាមានលក្ខណៈឆ្លងសាហាវខ្លាំងជាង វីរុស Delta ដែលរកឃើញដំបូង នៅក្នុងប្រទេសឥណ្ឌា។
លោក Hirokazu Matsuno ប្រធានលេខាធិការខុទ្ទកាល័យ បានប្រាប់សន្និសីទសារព័ត៌មានមួយថា អ្នកធ្វើដំណើរ មានប្រវត្ដិទើបនឹងទៅប្រទេស Botswana, Eswatini, Lesotho, Namibia, អាហ្វ្រិកខាងត្បូង និង Zimbabwe នឹងតម្រូវឱ្យធ្វើចត្តាឡីស័ក ចំនួន១០ថ្ងៃ នៅក្នុងកន្លែងដែលកំណត់ ដោយរដ្ឋាភិបាល ខណៈពួកគេចូលមកដល់ជប៉ុន។
ក្រុមអ្នកវិទ្យាសាស្ត្រអាហ្វ្រិកខាងត្បូង បានបញ្ជាក់ថា មន្រ្ដីជំនាញបានរកឃើញករណីឆ្លងវីរុស កូវីដ-១៩បំប្លែងខ្លួនថ្មី B.1.1.529 ក្នុងចំនួនតិចតួច។ ប៉ុន្ដែអ្នកវិទ្យាសាស្រ្ដកំពុងស្រាវជ្រាវ ឈ្វេងយល់ ពីផលប៉ះពាល់របស់វា។ ដោយឡែក អង្គការសុខភាពពិភពលោក (WHO) ក៏កំពុងសិក្សា ដើម្បីកំណត់ឥទ្ធិពល នៃវីរុសបំប្លែងថ្មីនេះផងដែរ៕