សិង្ហបុរី៖ ស្របពេលចក្រភពអង់គ្លេស និង អ៊ីស្រាអែល រកឃើញ និង ព្រួយបារម្ភកាន់តែខ្លាំង ឡើង ពីវីរុសបំប្លែងខ្លួនថ្មី នៅប្រទេសអាហ្រ្វិកខាងត្បូងនោះ សិង្ហបុរី ក៏បានចេញបម្រាម រឹតបន្ដឹងដល់អ្នកធ្វើដំណើរ មកពីប្រទេសចំនួន៧ នៅទ្វីបអាហ្វ្រិក ចូលមកក្នុងប្រទេសរបស់ខ្លួន។
បើតាមសារព័ត៌មាន CNA បានចេញផ្សាយថា ក្រសួងសុខាភិបាលសិង្ហបុរី (MOH) បានបញ្ជាក់ នៅថ្ងៃទី២៦ ខែវិច្ឆិកា ឆ្នាំ២០២១ ថា សិង្ហបុរី នឹងរឹតបន្ដឹងដល់អ្នកដំណើរ ដែលមានប្រវត្ដិថ្មីៗ ទៅកាន់ប្រទេសចំនួន៧ នៅទ្វីបអាហ្វ្រិក មិនអនុញ្ញាតឲ្យចូលមកក្នុងប្រទេស។ ការចេញបម្រាមដាក់កំហិតបែបនេះ ក៏ដោយសារមានការព្រួយបារម្ភ ពីវីរុសបំប្លែងខ្លួនថ្មី នៅប្រទេសអាហ្វ្រិកខាងត្បូង ក្រោយមានរបាយការណ៍ថា វីរុសប្រភេទនេះ អាចឆ្លងខ្លាំងជាងកូវីដ-១៩ ហើយបច្ចុប្បន្ន កំពុងឆ្លងរាលដាល នៅទីនោះ។
ក្រសួងសុខាភិបាលសិង្ហបុរី បានបន្ថែមថា គ្រប់អ្នកកាន់លិខិតឆ្លងដែន រយៈពេលវែង និង អ្នកទេសចរ រយៈពេលខ្លីទាំងអស់ មានប្រវត្តិធ្វើដំណើរ ក្នុងរយៈពេល១៤ថ្ងៃចុងក្រោយ ទៅកាន់ប្រទេស Botswana, Eswatini, Lesotho, Mozambique, Namibia, South Africa និង Zimbabwe នឹងមិនត្រូវបានអនុញ្ញាតឱ្យចូលមកកាន់សិង្ហបុរី ឬ ឆ្លងកាត់ប្រទេសអាស៊ានមួយនេះ ចាប់ពីវេលាម៉ោង ១១ និង៥៩នាទីយប់ ថ្ងៃសៅរ៍ ទី២៧ ខែវិច្ឆិកា ឆ្នាំ២០២១។ ប៉ុន្ដែបម្រាមនេះ ក៏បានអនុគ្រោះសម្រាប់អ្នកទទួលបានកាអនុញ្ញាតជាអាទិភាព សម្រាប់ចូលមកក្នុងប្រទេសសិង្ហបុរីតែប៉ុណ្ណោះ។
ក្រសួងសុខាភិបាលសិង្ហបុរី បានបញ្ជាក់ទៀតថា សម្រាប់ពលរដ្ឋសិង្ហបុរី និងអ្នករស់នៅអចិន្ត្រៃយ៍ ដែលត្រឡប់មកពីប្រទេសទាំងនេះ នឹងត្រូវជូនដំណឹង អំពីការស្នាក់នៅផ្ទះ រយៈពេល១០ថ្ងៃ នៅកន្លែងជាក់លាក់ណាមួយ។ បើតាមសេចក្ដីរាយការណ៍ វីរុសបំប្លែងខ្លួនថ្មី នៅអាហ្វ្រិកខាងត្បូង ដែលមានលេខសម្គាល់ B.1.1.529 កំពុងតែឆ្លងរាលដាល នៅក្នុងប្រទេស Botswana, Eswatini, Lesotho, Mozambique, Namibia, អាហ្វ្រិកខាងត្បូង និង Zimbabwe ៕
