រាជធានីបាងកក៖ ស្របពេលប្រធានាធិបតីសហរដ្ឋអាមេរិក បានបញ្ជាឲ្យបញ្ចេញប្រេង ចំនួន៥០លានធុង ចេញពីប្រេងបម្រុងយុទ្ធសាស្រ្ដរបស់ខ្លួន ដើម្បីជួយឲ្យតម្លៃប្រេងចុះថោកនោះ នាយករដ្ឋមន្រ្ដីថៃ ក៏បានចេញបញ្ហាឲ្យបញ្ចុះតម្លៃប្រេងឥន្ធនៈផងដែរ។
បើតាមសារព័ត៌មានថៃ « Bangkok Post» បានចេញផ្សាយថា លោក ប្រាយុទ្ធ ចាន់អូចា (Prayut Chan-o-cha) នាយករដ្ឋមន្ត្រីថៃ បានបញ្ជាឲ្យក្រសួងថាមពល រិះរកវិធានការបញ្ចុះតម្លៃប្រេងឥន្ធនៈ។ លោកនាយករដ្ឋមន្រ្ដី បានចេញបញ្ជាបែបនេះ ក្រោយពេលមានជំនួបមួយជាមួយសមាជិកសភាជាតិថៃ។
ក្រសួងថាមពលថៃ បានបញ្ជាក់ថា ក្រសួងនឹងដាក់ចេញវិធានការ បញ្ចុះតម្លៃប្រេងនេះ អាចនឹងដំណើរការ នៅខែក្រោយ។ ចំណែកលោកនាយករដ្ឋមន្ត្រី ចង់ឲ្យមានការបញ្ចុះតម្លៃប្រេងឲ្យបានឆាប់ ដោយមានតម្លៃ ក្រោម៣០បាត (លុយថៃ) ឬស្មើនឹង០,៩០ដុល្លារសហរដ្ឋអាមេរិក ក្នុងមួយលីត្រ ។
លោក Supattanapong Punmeechaow រដ្ឋមន្ត្រីក្រសួងថាមពលថៃ បានបញ្ជាក់ថា ក្រុមហ៊ុន ប្រេងឥន្ធនៈថៃ PTT អាចនឹងបញ្ចុះតម្លៃប្រេងបន្ថែមទៀត។ រីឯក្រុមហ៊ុនផ្សេងៗទៀត ក៏អាចនឹងបញ្ចុះតម្លៃតាមនេះផងដែរ។
លោក Supattanapong Punmeechaow រដ្ឋមន្ត្រីក្រសួងថាមពលថៃ បានបន្ថែមថា អង្គការ នៃប្រទេសនាំប្រេងចូល ហៅកាត់ «OPEC» នឹងបើកិច្ចប្រជុំកំពូលរបស់ខ្លួន នៅថ្ងៃទី៤ ខែធ្នូ ឆ្នាំ២០២១។ កិច្ចប្រជុំនេះ នឹងសម្រេចទៅលើតម្លៃប្រេងរបស់ពិភពលោក។
បច្ចុប្បន្ន តម្លៃប្រេងឥន្ធនៈនៅលើពិភពលោក បានចុះថ្លៃ ក្រោយពេលលោក ចូ បៃដិន ប្រធានាធិបតីសហរដ្ឋអាមេរិក បានសម្រេចបញ្ជាឲ្យបញ្ចេញប្រេង ចំនួន៥០លានបារ៉ែល ឬធុង ចេញពីឃ្លាំងប្រេងបម្រុងយុទ្ធសាស្ដ្ររបស់ខ្លួន។ ស្របគ្នានេះដែរ ប្រទេសឥណ្ឌា ក៏នឹងបញ្ចេញប្រេងបម្រុងរបស់ខ្លួន ចំនួន៥លានបារ៉ែល ខណៈកូរ៉េខាងត្បូង ជប៉ុន និងចិន នឹងប្រកាស អំពីបរិមាណ និងពេលវេលា នៃការបញ្ចេញប្រេងរបស់ខ្លួន នៅក្នុងពេលវេលាសមស្របនេះផងដែរ៕