ខេត្តកណ្ដាល ៖ កាលពីយប់ថ្ងៃទី១៩ ខែតុលា ឆ្នាំ២០២១ លោក នូ សុវណ្ណារ៉ា អភិបាលក្រុងតាតខ្មៅ, និងលោកមឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្ដាល បានដឹកនាំកម្លាំងពាក់ព័ន្ធ បានចុះចាប់រថយន្តដឹកខ្សាច់ខុសម៉ោងទាំងយប់ចំនួន៩គ្រឿង ដើម្បីចាត់ការតាមផ្លូវច្បាប់។
លោក នូ សុវណ្ណារ៉ា បានឲ្យដឹងថា ការចុះចាប់រថយន្តដឹកខ្សាច់លើសម៉ោងកំណត់នេះ ធ្វើឡើងដើម្បីរឹតបន្តឹងការគោរពតាមច្បាប់ចរាចរណ៍ និងសារាចររបស់រដ្ឋបាលក្រុង ដើម្បីគ្រប់គ្រងមិនឱ្យមានការបំពានច្បាប់ ពីសំណាក់ក្រុមឡានដឹកខ្សាច់ឡើយ។
លោក មឹង យូឡេង បានបញ្ជាក់ថា ការចុះចាប់រថយន្តនេះ ធ្វើទៅតាមច្បាប់ក្រោយមើលឃើញក្រុមឡានដឹកខ្សាច់ចេញពីដេប៉ូមកដោយដឹកខ្សាច់សើម ដឹកខុសម៉ោងពេលវេលា ហើយជំនាញនឹងថ្លឹងទម្ងន់ បើមើលឃើញថា លើសទម្ងន់នោះជំនាញនឹងពិន័យតាមផ្លូវច្បាប់ ហើយរថយន្តនឹងឃាត់ទុករយៈពេលមួយឆ្នាំ៕
