រដ្ឋធានីញូវដេលី៖ ភ្លៀងបានវាយប្រហារមកយ៉ាងខ្លាំង បង្កឲ្យកើតមាន គ្រោះទឹកជំនន់ និង រអិលបាក់ដី បានសម្លាប់មនុស្សយ៉ាងតិច២៦នាក់ នៅក្នុងរដ្ឋ Kerala នាភាគខាងត្បូង ប្រទេសឥណ្ឌា នៅថ្ងៃអាទិត្យ ទី១៧ ខែតុលា ឆ្នាំ២០២១នេះ។
បើតាមសារព័ត៌មាន BBC បានចេញផ្សាយ នៅថ្ងៃទី១៨ ខែតុលា ថា ភ្លៀងបានវាយប្រហារយ៉ាងខ្លាំងទៅលើរដ្ឋ Kerala ចាប់តាំងពីថ្ងៃទី១៦ ខែតុលា ខណៈមកទល់នឹងពេលនេះ ភ្លៀងនៅតែបន្តធ្លាក់។ គ្រោះធម្មជាតិនេះ បានបង្កឲ្យមានទឹកជំនន់ជន់លិចតំបន់ជាច្រើន ធ្វើឲ្យមនុស្សរាប់សិបនាក់ ត្រូវរាយការណ៍ថា បានបាត់ខ្លួន។ ចំណែកក្រុមអ្នកជួយសង្រ្គោះ ក្នុងនោះមានទាំងយោធាផង ក៏កំពុងតែបន្តប្រតិបត្តិការ ជួយសង្គ្រោះ និងស្វែងរកអ្នកបាត់ខ្លួន។
បើតាមអាជ្ញាធរឥណ្ឌា បានឲ្យដឹងថា នៅក្នុងចំណោមជនរងគ្រោះទាំងនោះ ភាគច្រើនបានស្លាប់ ដោយសារការរអិលបាក់ដី។បើតាមមន្ត្រីឧតុនិយម បានអះអាងថា ភ្លៀងនៅតែបន្ដធ្លាក់ខ្លាំង ដោយសារសម្ពាធទាប មកពីតំបន់សមុទ្រអារ៉ាប់៕
