ប៉ុន្មានថ្ងៃចុងក្រោយនេះ សង្កេតឃើញថា មានអ្នកលេងបណ្ដាញសង្គមហ្វេសប៊ុកក្នុងប្រទេសជាច្រើនបាននាំគ្នាបំផុសសកម្មភាពទទួលទានប្រទាលបាតដៃ ឬប្រទាលបាតដៃព្រះ (ឈ្មោះហៅតាមតំបន់) ទាំងដែលមិនប្រាកដថា តើការទទួលទានរុក្ខជាតិប្រភេទនេះចម្រើនដល់រាងកាយ ឬគ្រោះថ្នាក់ ។
យោងតាមសកម្មភាពជាក់ស្ដែងប៉ុន្មានថ្ងៃចុងក្រោយនេះ បានឱ្យឃើញថា អ្នកលេងហ្វេសប៊ុកជាច្រើនបាននាំគ្នាទទួលទាន ប្រទាលបាតដៃ ឬប្រទាលបាតដៃព្រះ ជាមួយអំបិលម្ទេស ចាត់ទុកដូចជាផ្លែស្វាយខ្ចី និងម្កាក់ដូច្នេះដែរ មិនតែប៉ុណ្ណោះ ថែមទាំងត្រូវបានគេយកទៅលក់ជាមួយគ្រឿងម្ជូរផ្សេងៗផងដែរ ។
ជាក់ស្ដែងមានទីតាំងលក់គ្រឿងម្ជូរល្បីឈ្មោះមួយកន្លែងនៅរាជធានីភ្នំពេញ បានបង្ហោះផ្សាយលក់ប្រទាល ប្រទាលបាតដៃ ឬប្រទាលបាតដៃព្រះ យ៉ាងផុសផុលនៅលើទំព័រហ្វេសប៊ុករបស់ខ្លួន ហើយថែងទាំងបញ្ជាក់ថា លក់ដាច់ខ្លាំងថែមទៀតផង ។
ជុំវិញនឹងការផុសផុលខាងលើនេះដែរ ក៏មានអ្នកលេងហ្វេសប៊ុកមួយចំនួនតូចដែលមានចំណេះដឹងផ្នែករុក្ខជាតិ និងបន្លែ ក៏ដូចគ្នាជាមួយឯកសារជាច្រើនរបស់បរទេស បានបង្ហាញថា ប្រទាលបាតដៃ ឬប្រទាលបាតដៃព្រះ មានឈ្មោះជាភាសាបច្ចេកទេសថា Opuntia cochenillifera ដែលមានរូបរាងដូចគ្នាទាំងស្រុងជាមួយ Opuntia ficus-indica ដែលជារុក្ខជាតិអាចទទួលទានបានទាំងស្លឹក និងផ្លែរបស់វា ។
ត្បិតតែ Opuntia cochenillifera និង Opuntia ficus-indica ស្ថិតនៅក្នុងអម្បូរ Cactus តែមួយ តែមិនមានឯកសារណាមួយបញ្ជាក់ថា Opuntia cochenillifera ដែលខ្មែរយើងហៅថា ប្រទាលបាតដៃ ឬបាតដៃព្រះ នេះទទួលទានបានដូច Opuntia ficus-indica ឡើយ ។
និយាយពី Opuntia ficus-indica ត្រូវបានគេរកឃើញច្រើននៅប្រទេស មិកស៊ិក ហើយផ្លែរបស់វាមានរស់ជាតិផ្អែមដែលគេនិយមទទួលទានជំនួយដល់សុខភាព ព្រោះវាសម្បូរទៅដោយវីតាមីន C ប៉ុន្តែមិនសូវល្អសម្រាប់អ្នកដែលមានបញ្ហាផ្នែកប្រព័ន្ធរំលាយអាហារឡើយ ។
ចំពោះស្លឹក Opuntia ficus-indica ក៏ត្រូវបានគេយកទៅធ្វើជាបន្លែងដ៏មានរសជាតិឆ្ងាញ់ពិសារ ជាពិសេសគេយកវាទៅចម្អិនជាមួយស៊ុត ហើយក្លាយជាអាហារពេលព្រឹកដ៏ពេញនិយមមួយនៅប្រទេសអឺរ៉ុប ។
Opuntia ficus-indica នេះផងដែរ ជាប្រភេទរុក្ខជាតិមួយដែលងាយស្រួលដាំដុះបំផុត ដោយវាមិនត្រូវការការថែទាំខ្លាំងឡើយ ហើយបើទោះជាភាគច្រើនឃើញដុះនៅតាមតំបន់ក្ដៅក៏ពិតមែន ប៉ុន្តែក្នុងខ្លួនរបស់វាគឺពោពេញទៅដោយសារធាតុទឹក មិនខុសគ្នាពីដើមដំបងយក្សខ្មែរយើងឡើយ ។
យ៉ាងណាមិញចំពោះ Opuntia cochenillifera ដែលខ្មែរយើងហៅថា ប្រទាលបាតដៃ ឬបាតដៃព្រះ នៅតែមិនច្បាស់ថា យើងអាចទទួលទានប្រកបដោយសុវត្ថិភាពដូច Opuntia ficus-indica ដែរ ឬក៏អត់ ទាំងដែលមានប្រជាពលរដ្ឋខ្មែរមួយចំនួនកំពុងសម្រុកទទួលទាន ហើយខ្លះទៀតក៏ទាមទារឱ្យមានការបញ្ជាក់ពីអ្នកជំនាញ ឬក្រសួងពាក់ព័ន្ធ ថាតើការបរិភោគប្រទាលប្រភេទនេះមានផលិតប៉ះពាល់ដល់សុខភាព ឬក៏អត់ ?