រដ្ឋធានីប៉េកាំង៖ គ្រោះរញ្ជួយដី មានកម្លាំង៦រ៉ិចទ័រ បានវាយប្រហារលើសង្កាត់លូសៀន (Luxian) ទីក្រុង លូចូវ (Luzhou) ខេត្តស៊ីឈួន (Sichuan) នាភាគនិរតី ប្រទេសចិន បណ្ដាលឲ្យមនុស្ស៣បាត់បង់ជីវិត និង ជាង៦០នាក់ផ្សេងទៀតរងរបួស។
បើតាមសារព័ត៌មាន Al Jazeera បានចេញផ្សាយ នៅថ្ងៃព្រហស្បតិ៍ (ទី១៦ ខែកញ្ញា ឆ្នាំ២០២១) ថា យ៉ាងហោចណាស់មានមនុស្ស៣នាក់ បានស្លាប់ និងជាង៦០នាក់ផ្សេងទៀតរងរបួស នៅក្នុងគ្រោះរញ្ជួយដី នៅខេស៊ីឈួន (Sichuan) ប្រទេសចិន។ ការរញ្ជួយដីនេះ បានកើតឡើង នៅវេលាម៉ោង៤ និង៣០នាទីព្រឹក (វេលាក្នុងតំបន់) ថ្ងៃទី១៦ ខែកញ្ញា សង្កាត់ Luxian មានចម្ងាយប្រហែល ១២០គីឡូម៉ែត្រ ភាគនិរតី នៃទីក្រុង Chongqing ដែលមានប្រជាជនរស់នៅ៣០លាននាក់។
អាជ្ញាធរក្នុងតំបន់ បានបញ្ជាក់ថា អ្នកស្លាប់ និងរងរបួស ត្រូវបានរាយការណ៍ថា នៅភូមិកាវប៉ាវ (Caoba) ឃុំ ហ្វូជី (Fuji) នៃសង្កាត់ Luxian របស់ទីក្រុង Luzhou ក្នុងខេត្ត Sichuan ភាគនិរតីប្រទេសចិន។ បើតាមមជ្ឈមណ្ឌលតាមដានគ្រោះរញ្ជួយដីចិន គ្រោះរញ្ជួយដីខាងលើនេះ បានកើតឡើងនៅវេលាម៉ោង ០៤៖៣៣នាទីព្រឹកថ្ងៃព្រហស្បត៍នេះ ពីក្នុងជម្រៅដី ១០គីឡូម៉ែត្រ។
អាជ្ញាធរខេត្តស៊ីឈួន បានបញ្ជាក់ថា លំនៅឋានរបស់ប្រជាជន សរុប៧៣៧ខ្នង បានដួលរលំទាំងស្រុង, ៧២ខ្នងរងការខូចខាតធ្ងន់ធ្ងរ និង ៧ ២៩០ខ្នងផ្សេងទៀត រងការខូចខាតបន្តិចបន្តួច។ ដោយឡែក ប្រជាជនជាង ៦ ៩០០នាក់ ត្រូវបានសម្រេចឲ្យផ្លាស់ប្តូរទីលំនៅ និងជាង ១០ ០០០នាក់ ត្រូវដាក់ឲ្យស្នាក់នៅក្នុងជម្រកបណ្តោះអាសន្ន។
ជាមួយគ្នានេះ ក្រុមសង្គ្រោះគ្រោះមហន្តរាយរញ្ជួយដីចិន នៅថ្ងៃទី១៦ ខែកញ្ញា បានបញ្ជូនកម្លាំងសង្គ្រោះ៨៩០នាក់ ចូលទៅចាត់ចែងការងារ នៅកន្លែងកើតហេតុ ខណៈ ៤ ៦០០នាក់ផ្សេងទៀត ត្រូវបានបញ្ជាឲ្យត្រៀមខ្លួន សម្រាប់ចេញប្រតិបត្តិការ នៅក្នុងករណីបន្ទាន់៕
