រដ្ឋធានីវ៉ាស៊ីនតោន៖ យន្ដហោះទម្លាក់គ្រាប់បែកបំបាំងកាយដ៏ទំនើប និងមានតម្លៃថ្លៃបំផុត នៅលើពិភពលោករបស់សហរដ្ឋអាមេរិក បានបង្ខំចិត្តចុះចតបន្ទាន់ ដោយសារមានបញ្ហាខុសប្រក្រតី នៅក្នុងអំឡុងពេលហោះហើរ ហើយអាកាសយានិក នៅក្នុងយន្ដហោះនោះ មិនបានរងគ្រោះថ្នាក់នោះឡើយ។
សារព័ត៌មានរុស្ស៊ី Sputnik បានចេញផ្សាយ នៅថ្ងៃទី១៥ ខែកញ្ញា ឆ្នាំ២០២១ ថា បើតាមកងទ័ពអាកាសរបស់សហរដ្ឋអាមេរិក បានថ្លែង កាលពីថ្ងៃអង្គារ (ទី១៤ ខែកញ្ញា) ថា យន្ដហោះទម្លាក់គ្រាប់បែកបំបាំងកាយដ៏ទំនើប B-2 Spirit បានហោះហើរ ប្រតិបត្ដិការហ្វឹកហ្វឺន តាមធម្មតា។ ប៉ុន្ដែនៅក្នុងអំឡុងពេលហោះហើរនោះ យន្ដហោះមានបញ្ហា ហើយត្រូវបង្ខំចិត្តចុះចតបន្ទាន់ ហើយយន្ដបានរងរកការខូចខាតផ្នែកមួយចំនួន។
មន្រ្ដីទ័ពអាកាសអាមេរិក បានបញ្ជាក់ថា យន្ដហោះទម្លាក់គ្រាប់ B-2 Spirit នោះ បានចុះចតជាបន្ទាន់ នៅក្នុងអាកាសយានដ្ឋានទ័ពអាកាសអាមេរិក Whiteman ស្ថិតក្នុងរដ្ឋMissouri ។ ប៉ុន្ដែមន្រ្ដីយោធាអាមេរិក មិនបានបញ្ជាក់លម្អិត អំពីមូលហេតុ បង្ខំឱ្យយន្ដហោះទម្លាក់គ្រាប់ B-2 នេះចុះចតនោះដែរ។ ដោយឡែក ទំហំ នៃការខូចខាត ក៏មន្រ្ដីយោធាអាមេរិក មិនបានប្រាប់ដែរ ដោយគ្រាន់តែប្រាប់ថា គ្មានអាកាសយានិកណាម្នាក់ នៅក្នុងយន្ដហោះនោះរងគ្រោះថ្នាក់នោះឡើយ៕
