ទីក្រុងតូក្យូ៖ ជប៉ុន កាលពីថ្ងៃទី១៣ ខែកញ្ញា ឆ្នាំ២០២១ បានព្រមានដល់ប្រជាពលរដ្ឋរបស់ខ្លួន អំពីការវាយប្រហារណាមួយ អាចនឹងកើតមានឡើង នៅក្នុងប្រទេសអាស៊ី-អាគ្នេយ៍ (អាស៊ាន) ចំនួន៦ ហើយរដ្ឋាភិបាលទីក្រុងតូក្យូ កំពុងតែជំរុញដល់ពលរដ្ឋរបស់ខ្លួន នៅឲ្យឆ្ងាយពីកន្លែងមានពិធីសាសនា និង កន្លែងប្រមូលផ្ដុំធំៗ។
សារព័ត៌មានចក្រភពអង់គ្លេស Independent បានចេញផ្សាយ កាលពីថ្ងៃទី១៣ ខែកញ្ញា ថា ក្រសួងការបរទេសជប៉ុន បានបញ្ជាក់ថា ខ្លួនបានទទួលព័ត៌មាន ពីការកើនឡើង នៃគ្រោះថ្នាក់នានា ដូចជា ការបំផ្ទុះគ្រាប់បែកអត្ដឃាត នៅក្នុងប្រទេសចំនួន៦ នៃតំបន់អាស៊ាន។ ជាមួយគ្នានេះ ក្រសួងការបរទេសជប៉ុន កំពុងតែជំរុញឲ្យពលរដ្ឋរបស់ខ្លួន ត្រូវនៅឲ្យឆ្ងាយ ពីកន្លែងមានការរៀបចំពិធីសាសនាធំៗ។
ក្រសួងការបរទេសជប៉ុន បានបន្ដថា ការព្រមាននេះ បានដកស្រង់របាយការណ៍ចារកម្មមួយ បានរាយការណ៍មកថា ការវាយប្រហារអត្ដឃាត អាចនឹងកើតមានឡើង នៅកន្លែងពិធីបូជាសាសនា និងកន្លែងជួបជុំធំ ៗ នៅក្នុងតំបន់។ ក្រសួងការបរទេសជប៉ុន បានផ្ញើសារព្រមាននេះទៅកាន់ពលរដ្ឋរបស់ខ្លួន នៅក្នុងប្រទេសឥណ្ឌូនេស៊ី ហ្វីលីពីន សិង្ហបុរី ម៉ាឡេស៊ី ថៃ និងមីយ៉ាន់ម៉ា។
ដោយឡែក រដ្ឋាភិបាលថៃ បានទាក់ទងទៅកាន់ស្ថានទូតជប៉ុន ប្រចាំប្រទេសរបស់ខ្លួន ដោយបានសាកសួរទៅមន្ត្រីទូតជប៉ុន សុំឱ្យជួយពន្យល់ ជុំវិញការលើកឡើង អំពីការព្រមាននេះ។ ប៉ុន្តែមន្រ្ដីស្ថានទូតជប៉ុន គ្រាន់តែឆ្លើយថា នេះជាការណែនាំ មកពីក្រសួងការបរទេសជប៉ុន នៅក្នុងទីក្រុងតូក្យូ តាមរយៈការផ្ញើសារទៅកាន់ប្រជាពលរដ្ឋរបស់ខ្លួនតែប៉ុណ្ណោះ។
លោក Tanee Sangrat អគ្គនាយក នៃអគ្គនាយកដ្ឋានព័ត៌មាន និងជាអ្នកនាំពាក្យ ក្រសួងការបរទេសថៃ បានថ្លែងថា៖ «ក្រសួងការបរទេសជប៉ុន មិនទាន់បានបង្ហាញ អំពីប្រភពដើម នៃការព្រមាននេះនៅឡើយ។ ដោយឡែកស្ថានការណ៍ទាំងនេះ ក៏ជប៉ុនមិនទាន់មានព័ត៌មានណាមួយ បញ្ជាក់ឲ្យបានច្បាស់ដែរ។ ចំណែក ការព្រមានស្រដៀងគ្នានេះ ក៏ត្រូវបានផ្ញើ តាមអ៊ីមែល ទៅកាន់ពលរដ្ឋជប៉ុន នៅក្នុងឥណ្ឌូនេស៊ី ហ្វីលីពីន សិង្ហបុរី ម៉ាឡេស៊ី និងមីយ៉ាន់ម៉ា៕