រដ្ឋធានីវ៉ាស៊ីនតោន៖ រហូតមកដល់ពេលនេះ សហរដ្ឋអាមេរិក កំពុងតែត្រៀមរៀបចំ ចាក់វ៉ាក់សាំងប្រឆាំងនឹងវីរុសកូវីដ-១៩ Pfizer ជូនដល់កុមារ ដែលមានអាយុ ចាប់ពី៥ឆ្នាំដល់១១ឆ្នាំ ហើយក្រុមហ៊ុនផលិតឱសថដ៏ល្បីល្បាញនេះ ក៏កំពុងតែសាកល្បងលើកូនក្មេង មានអាយុ២ឆ្នាំបន្ដទៀត។
បើតាមបណ្ដាញទូរទស្សន៍ CBS News បានផ្សាយ កាលពីថ្ងៃទី១២ ខែកញ្ញា ឆ្នាំ២០២១ ថា លោកវេជ្ជបណ្ឌិត Scott Gottlieb អតីតប្រធានរដ្ឋបាលចំណីអាហារ និង ឱសថសហរដ្ឋអាមេរិក ហៅកាត់ FDA បានព្យាករថា FDA នឹងអនុញ្ញាតឲ្យចាក់វ៉ាកសាំងប្រឆាំងនឹងកូវីដរបស់ក្រុមហ៊ុន Pfizer ជូនដល់កុមារ មានអាយុ ចាប់ពី៥ឆ្នាំដល់១១ឆ្នាំ នៅចុងខែតុលា ឆ្នាំ២០២១នេះ។
លោកវេជ្ជបណ្ឌិត Scott Gottlieb បច្ចុប្បន្នបម្រើការងារ ជាក្រុមប្រឹក្សានាយកក្រុមហ៊ុន Pfizer បានបញ្ជាក់ នៅក្នុងបទសម្ភាសន៍មួយ ថ្លែងទៅកាន់ប្រជាជាតិថា ក្រុមហ៊ុនឱសថ Pfizer កំពុង តែរំពឹងថា នឹងទទួលបានទិន្នន័យ អំពីវ៉ាក់សាំងរបស់ខ្លួន ចំពោះការចាក់ទៅលើកុមារតូចៗ នៅមុនដំណាច់ខែកញ្ញា នេះ។ បន្ទាប់មក ក្រុមហ៊ុន Pfizer នឹងដាក់ជូនទៅរដ្ឋបាលចំណីអាហារ និងឱសថរបស់សហរដ្ឋអាមេរិក (FDA) ឲ្យបានលឿនបំផុត។ រីឯភ្នាក់ងារ FDA បាននិយាយថា FDA នឹងមានពេលជាច្រើនសប្តាហ៍ ឬជាង១ខែ មុននឹងកំណត់ ថាតើ FDA នឹងអនុញ្ញាតឱ្យចាក់វ៉ាក់សាំងប្រឆាំងនឹងកូវីដនេះ ចូលដល់ក្មេង មានអាយុចន្លោះពី៥-១១ ឆ្នាំដែរឬយ៉ាងណា។
ទោះជាយ៉ាងណា លោកវេជ្ជបណ្ឌិត Scott Gottlieb បានព្យាករថា វ៉ាក់សាំង Pfizer នេះ នឹងត្រូវអនុម័តយ៉ាងលឿន សម្រាប់ចាក់ជូនដល់កុមារ មានអាយុ ចន្លោះពី៥ឆ្នាំដល់១១ឆ្នាំ ក្នុងចុងខែតុលា ខាងមុខនេះ។ ជាមួយគ្នានេះ ក្រុមអ្នកជំនាញរបស់ក្រុមហ៊ុន Pfizer កំពុងតែបន្ដសាកល្បង លើរបបវ៉ាក់សាំង ចំនួន២ដូស ដល់កុមារ មានអាយុចាប់ពី២ឆ្នាំឡើងបន្ដទៀត៕
