រាជធានីភ្នំពេញ៖ កំពូលតារាចម្រៀងចាស់វស្សា ម៉េង កែវពេជ្ជតា ថ្មីៗនេះបានផ្ទុះអារម្មណ៍មិនសប្បាយចិត្តសាជាថ្មីទៅលើអ្នកដែលយកបទចម្រៀងរបស់អ្នកនាងទៅច្រៀង ដោយមិនបានដាក់ប្រភពម្ចាស់ស្នាដៃដើមឱ្យបានច្បាស់លាស់ ដោយម្នាក់ក្នុងចំណោមនោះគឺមានឈ្មោះកញ្ញា បាន មុន្នីល័ក្ខ ម្នាក់ដែរ រហូតដល់អ្នកនាងប្រើពាក្យថា បាន មុន្នីល័ក្ខ ជា “ស្រីចរិតមិនកែ” តែម្ដង។
ដើមហេតុនៃដំណើររឿងផ្ដើមឡើងកាលពីថ្ងៃទី ០៩ ខែ កញ្ញា ដោយតារាចម្រៀង ម៉េង កែវពេជ្ជតា បានធ្វើការបង្ហោះខ្លឹមសារមិនសប្បាយចិត្តដោយមានភ្ជាប់ជាមួយឆានែលយូធូបមួយឈ្មោះថា Ban monyleak official ដោយមានរូបកញ្ញា បាន មុន្នីល័ក្ខ នៅលើក្របផងដែរនោះឱ្យដឹងថា៖ “ បទ: ជំនោរដើមខែ ជាបទចម្រៀងដ៏មានប្រជាប្រិយភាពខ្លាំងក្នុងចំណោមបទល្បីៗជាច្រើនរយពាន់បទរបស់នាងខ្ញុំ ម៉េង កែវពេជ្ជតា។ ថ្វីដ្បិតតែបទនេះមានប្រភពពីអ្នកចម្រៀងរៀមច្បងជំនាន់សាធារណៈរដ្ឋប្រជាមានិតកម្ពុជា( ១៩៧៩-៨៩ ) គឺលោកស្រី ម៉ម សុខា ប្រគំភ្លេងដោយក្រុមតន្ត្រីវិទ្យុជាតិកម្ពុជាប៉ុន្តែចំពោះទំនុកច្រៀងចាស់នោះ ពេជ្ជតាបានកែសម្រួលជាថ្មីខ្លះដើម្បីតម្រូវតាមតថភាពសង្គមសម័យព្រះរាជាណាចក្រកម្ពុជាគឺប្តូរពីបទចម្រៀងបែបនយោបាយមកជាបែបជីវភាពរស់នៅប្រចាំថ្ងៃរបស់ប្រជាកសិករខ្មែរទូទៅវិញដោយកាលណោះ ពេជ្ជតា បានប្រើពេលប្រើគំនិត និងដាក់អារម្មណ៍បញ្ចូលតួខ្លាំងណាស់ ទំរាំបទនេះក្លាយជាបទចម្រៀងមានអត្ថន័យសមស្របនិងកាន់តែពេញនិយមសម្រាប់អ្នកស្តាប់គ្រប់ស្រទាប់ ។ មិនតែប៉ុណ្ណោះនៅលើប្រព័ន្ធយូធូប ឃើញមានបងប្អូនយើងជាច្រើនមិនថាជាតារា ឬអ្នកធម្មតា រហូតដល់ខ្សែរាជវង្សក៏ចាប់អារម្មណ៍ថតបទចម្រៀងនេះឡើងវិញដែរ ក្នុងម្នាក់យ៉ាងហោចណាស់ក៏ពីរដង អ្នកខ្លះយកទាំងភ្លេងដើមរបស់ពេជ្ជតាទៅច្រៀងទៀតផង។ អ្នកដែលយកច្រៀងតាម ( Cover ) ទាំងនោះក៏ទទួលបានការសរសើរពីហ្វ៊ែនៗរបស់ពួកគេច្រើនគួរសម ។ មិនចម្លែកទេព្រោះបទនេះជាបទល្បីស្រាប់ហើយ។ ប៉ុន្តែដែលចម្លែកនៅត្រង់ថា លើ Subtitle ពេលបង្ហោះរបស់ពួកគេ ក៏ដូចជានៅលើខមិនតបទៅអ្នកគាំទ្រ មិនដែលឃើញអ្នកច្រៀងCover ឬម្ចាស់ឆានែលយូធូបខ្លះនោះហ៊ានប្រាប់គេថាបទនេះយកតាមលំនាំពេជ្ជតាឬដាក់ Credit ឱ្យម្ចាស់សំនៀងដើមទេក្រៅពីប្រើពាក្យដដែលៗថា មរតកដើម …”។
ក្រោយពីបង្ហោះសារយ៉ាងវែងអន្លាយមិនបានប៉ុន្មានម៉ោងផង ក៏ស្រាប់តែមានគណនីហ្វេសប៊ុកមួយឈ្មោះថា Ban monyleak Fan បានចេញមុខតបតនិយាយផ្លែផ្កាបកមកម៉េង កែវពេជ្ជតា វិញ ដោយបាននិយាយថា ពេជ្ជតា ក៏ធ្លាប់យកបទគេមកច្រៀង និងបានសរសេរវៃបកធ្ងន់ៗថា ម៉េវ កែវពេជ្ជតា ចាស់ហើយមិនព្រមទៅវត្តកាន់សិលជាដើម…។ ក្រោយការវ៉ៃបកបែបនេះ ម៉េង កែវពេជ្ជតា ទ្រាំនៅស្ងៀមមិនបានក៏ចេញមុខពន្លះជាថ្មីពេញដោយអារម្មណ៍ខឹងសម្បាថា៖ “ចរិតនាងមិនកែប្រែទេបងប្អូន មិនសុំទោសក៏ហីចុះ តែមើលសម្តីនាង ខាំញេញយ៉ាងគគ្លើនគួរឱ្យខ្នាញ់តើនាងសមជាតារាគំរូឱ្យគេគោរពទេបងប្អូន ? តើនាងសមជាមនុស្សគំរូដល់មហាជនទេបងប្អូន? ចូលមកខមិនតែពាក្យដដែលៗគ្រប់កន្លែងតែម្ដងដូចគ្មានមេបាប្រដៅ ខ្ញុំដឹងថាអ្នកទាំងអស់គ្នានឹងនិយាយប្រាប់ខ្ញុំថាខមិននេះជារបស់ Fan ប៉ុន្តែ បើជា Fan ក៏នាងដឹង ហេតុអីនាងបណ្តោយ ? បើនាងល្អនាងគួរតែហាមមែនទេ ? ចុះបើនាងមិនហាម បានន័យថាម៉េច ខ្ញុំក៏មាន Fansមិនតិចដែរ ប៉ុន្តែខ្ញុំមិនដែលឱ្យ Fan ធ្វើបែបនេះទេសូមបងប្អូនជួយពិចារណាតាមការគួរអំពីចរិតស្រីម្នាក់នេះផង”។
ប៉ុន្តែ ទោះជាយ៉ាងណា រហូតមកទល់ពេលនេះមិនទាន់ឃើញកញ្ញា បាន មុន្នីល័ក្ខ ចេញមុខឆ្លើយតបយ៉ាងណានោះឡើយនៅក្នុងរឿងនេះ ហើយគណនីហ្វេសប៊ុកផ្លូវការរបស់កញ្ញា ក៏ស្ងាត់សកម្មភាពមិនឃើញមានចេញប្រតិកម្មតបតអ្វីដែរ។ ដូច្នេះ ជម្លោះអាចនឹងឈានដល់ម្រិតណានោះ មានតែរង់ចាំមើលទាំងអស់គ្នា៕
