ថៃ ៖ សារព័ត៌មាន the Thaiger បានចេញផ្សាយនៅថ្ងៃទី២១ ខែកក្កដា ឆ្នាំ២០២១ ថា មានអ្នកគ្រូបង្រៀន ជនជាតិថៃម្នាក់វ័យ៣៩ឆ្នាំ បានស្លាប់ ក្រោយពីទទួលចាក់វ៉ាក់ AstraZeneca ជាដូសទី២ ខណៈដូសទី១ គឺវ៉ាក់សាំង Sinovac របស់ចិន។

ទទួលបានព័ត៌មានថ្មីៗទាន់ហេតុការណ៍រាល់ថ្ងៃ សូមចូលទៅកាន់ Channel Telegram KBN News

សារព័ត៌មានដដែលបន្តថា បុរសជាស្វាមីអ្នកគ្រូបង្រៀនរងគ្រោះ ដែលបានចាក់វ៉ាក់សាំងដូចគ្នាដែរនោះ បានរៀបរាប់ថា ក្រោយចាក់វ៉ាក់សាំង AstraZeneca ដូសទី២រួច ពួកគេមានអាការឈឺក្បាល និងក្តៅខ្លួនបន្តិចបន្តួច។ លុះដល់ពេលល្ងាច ប្រពន្ធរបស់គាត់ចាប់ផ្តើមមានអាការចង់ក្អួតចង្អោរខុសប្លែកពីធម្មតា ហើយនៅម៉ោងប្រមាណ ៧យប់នាងក៏បានស្លាប់បាត់ទៅ។

គួរបញ្ជាក់ថា អាជ្ញាធរសុខាភិបាលថៃ បានចេញគោលការណ៍ចាក់វ៉ាក់សាំងថ្មី ដោយតម្រូវឲ្យអ្នកដែលបានចាក់វ៉ាក់សាំង Sinovac នៅដូសទី១ នឹងត្រូវចាក់ AstraZeneca នៅដូសទី២ ដើម្បីប្រយុទ្ធប្រឆាំងនឹងវីរុសបម្លែងខ្លួនថ្មី Delta ដែលកំពុងរីករាលក្នុងប្រទេសថៃ។

ទោះជាយ៉ាងណា ករណីអ្នកគ្រូបង្រៀនស្លាប់នេះ អាជ្ញាធរ និងក្រុមគ្រូពេទ្យថៃ បានធ្វើការស៊ើបអង្កេតបន្ថែមទៀត ខណៈដែលអ្នកគ្រូបង្រៀនរងគ្រោះមានជំងឺលើសឈាមប្រចាំកាយផងដែរ៕