បរទេស៖ ក្រុមចោរប្លន់បានចាប់ពង្រត់មនុស្ស ចំនួន១០០នាក់ ដែលភាគច្រើនជាស្រ្ដីកំពុងបំបៅដោះកូន ហើយរហូតមកដល់ពេលនេះ អាជ្ញាធរនីហ្សេរីយ៉ា បានជួយរំដោះពួកគេឲ្យផុតពីក្រញាំដៃរបស់ពួកឧក្រិដ្ឋជន។
សារព័ត៌មាន BBC បានផ្សាយ នៅថ្ងៃទី២១ ខែកក្កដា ថា អាជ្ញាធរ នៅភាគពាយព្យ ប្រទេសនីហ្សេរីយ៉ា បានរំដោះស្ដ្រី និងកុមារ ចំនួន១០០នាក់ ដែលភាគច្រើន ជាស្រ្ដីកំពុងបំបៅដោះកូន។ ជនរងគ្រោះទាំងនេះ ត្រូវបានក្រុមចោរប្លន់ ចាប់ពង្រត់ កាលពីថ្ងៃទី៨ ខែមិថុនា ឆ្នាំ២០២១ នៅរដ្ឋ Zamfara ប្រទេសនីហ្សេរីយ៉ា។
អាជ្ញាធររដ្ឋ Zamfara បានបញ្ជាក់ថា នៅក្នុងហេតុការណ៍នោះ មានមនុស្ស៤នាក់ ត្រូវបានគេសម្លាប់។ ដោយឡែកជនរងគ្រោះទាំងអស់ ត្រូវបានរំដោះ ដោយមិនមានការបង់ប្រាក់លោះនោះឡើយ។ ប៉ុន្ដែអាជ្ញាធរ មិនបានបញ្ជាក់លម្អិត អំពីប្រតិបត្ដិការជួយសង្រ្គោះដល់ជនរងគ្រោះទាំងនោះឡើយ។
បើគិតចាប់តាំងពីខែធ្នូ ឆ្នាំ២០២១ រហូតមកដល់ពេលនេះ នៅក្នុងប្រទេសនីហ្សេរីយ៉ា មានមនុស្សជាង ១ ០០០នាក់ ត្រូវបានក្រុមឧក្រិដ្ឋជន ចាប់ពង្រត់។ ប៉ុន្ដែជនរងគ្រោះ ភាគច្រើន ត្រូវបានក្រុមឧក្រិដ្ឋជនដោះលែងមកវិញ បន្ទាប់ពីមានការបង់ប្រាក់លោះ តាមការទាមទាររបស់ពួកគេ។ ទោះជាយ៉ាងណា ក៏មានជនរងគ្រោះមួយចំនួន ត្រូវបានគេសម្លាប់ចោលផងដែរ។ ករណីនេះ អាជ្ញាធរបានស្ដីបន្ទោសដល់ក្រុមចោរប្លន់ប្រដាប់អាវុធ និងក្រុមចាប់ជំរិត៕