រាជធានីភ្នំពេញ ៖ នាពេលថ្មីៗកន្លងទៅនេះ អ្នកនាង គង់ ចាន់ស្រីមុំ រួមទាំងស្វាមី បានរៀបចំពិធីមួយមានឈ្មោះថា «រៀបរាមខ្នើយ» នៅក្នុងវត្តមួយកន្លែង ជាហេតុធ្វើឱ្យមហាជនមានការ ភ្ញាក់ផ្អើល និងសង្ស័យយ៉ាងខ្លាំងថា តើអ្នកម្តាយរូបនេះការរៀបចំពិធីនេះដើម្បីអ្វីដែរ?
បើយោងតាមការបង្ហោះនៅលើគណនីហ្វេសប៊ុកផេករបស់អ្នកនាង គង់ ចាន់ស្រីមុំ បានលើកឡើងថា «ប៉ាប៉ា ម៉ាមី មនមករៀបចំពិធីរៀបរាមខ្នេីយ ម្តងទៀត 💗តែកុំមេីលកាទ្រីតនកណ្តាលដូចជាសប្បាយក្អាកក្អាយដល់ហេីយ🥰👨👩👧នាងខ្ញុំនិងក្រុមគ្រួសារសូមអរព្រះគុណ លោកបង ថុងរី ដែលបានដេញវេលាយកថ្ងៃល្អ វេលាល្អ គឺថ្ងៃទី១២ ខែកក្កដា ឆ្នាំ២០២១ វេលាម៉ោង ៤:៣៣នាទី ព្រឹកជូនដល់គ្រួសារនាងខ្ញុំ»។
យ៉ាងណាមិញបន្ទាប់ពីតារាស្រីរូបនេះបង្ហោះទាក់ទិននឹងឈ្មោះពិធីខាងលើរួច ក៏មានប្រិយមិត្តអ្នកគាំទ្រជាច្រើនបានចោទជាចំងល់ថា តើគេធ្វើកម្មវិធី រៀបរាមខ្នើយនេះឡើងក្នុងន័យអ្វីដែរ?
ជាមួយគ្នានេះ ថ្វីបើអ្នកនាង គង់ ចាន់ស្រីមុំ ពុំបានបញ្ជាក់ពីសំនួរខាងលើ ក៏មានគណនីហ្វេសប៊ុកមួយបានបកស្រាយថា កម្មវិធីរៀបរាមខ្នើយនេះ គេរៀបចំឡើងដោយសារតែអ្នករៀបមង្គលការហើយមិនសូវមានសេចក្ដីសុខក្នុងគ្រួសារ រៀបការហើយយូរមិនមានកូន ឬពិបាកមានកូន ទើបគេរើសថ្ងៃល្អ រៀបចំពិធីនេះ ប្រៀបដូចជារៀបការម្ដងទៀត។ ចំណែកអ្នកខ្លះទៀតបានលើកឡើងថា គេរៀបពិធីនេះឡើងវិញ គឺដូចទៅនឹងការរៀបការម្ដងទៀត ដោយសារតែកាលពីមុនរៀបចំពិធីមង្គលការ ខុសខែថ្ងៃជាដើម៕