រាជធានីបាងកក៖ ក្រោយពេលមានមនុស្សស្លាប់ចំនួនដ៦៨នាក់ បន្ទាប់ពីការចាក់វ៉ាក់សាំងបង្ការកូវីដ-១៩នោះមក ស្ថាប័នជំនាញវេជ្ជសាស្រ្ដរបស់ប្រទេសថៃ បានបើកការស៊ើបអង្កេតលើករណីនេះ ហើយរកឃើញថា ក្នុងចំណោមអ្នកទាំង៦៨នោះ មាន១៣នាក់ មិនពាក់ព័ន្ធដោយផ្ទាល់នឹងការចាក់វ៉ាក់សាំង ខណៈ៥៥នាក់ផ្សេងទៀតកំពុងតែស៊ើបអង្កេត។
សារព័ត៌មាន The Nation បានចេញផ្សាយ នៅព្រឹក ថ្ងៃទី១៨ ខែមិថុនា ថា នាយកដ្ឋានគ្រប់គ្រងជំងឺឆ្លង (DDC) បានរាយការណ៍ កាលពីថ្ងៃព្រហស្បតិ៍ (ទី១៧ ខែមិថុនា) ថា មានមនុស្សចំនួន៦៨នាក់ បានបាត់បង់ជីវិត ក្រោយការចាក់វ៉ាក់សាំងបង្ការកូវីដ-១៩។
លោកវេជ្ជបណ្ឌិត Chawetsan Namwat ប្រធានផ្នែកគ្រប់គ្រងជំងឺ និងហានិភ័យដល់សុខភាពរបស់ DDC បានឲ្យដឹងថា «ក្នុងចំណោមអ្នកស្លាប់ចំនួន៦៨នាក់នោះ រួមមាន ១៣នាក់រកឃើញថា មិនទាក់ទងដោយផ្ទាល់នឹងការចាក់វ៉ាក់សាំងបង្ការកូវីដ-១៩នោះទេ ខណៈ៥៥នាក់ផ្សេងទៀត កំពុងស្ថិតក្នុងការស៊ើបអង្កេតនៅឡើយ។ រីឯលទ្ធផល នៃការស៊ើបអង្កេតនេះ នឹងចេញនៅសប្ដាហ៍ក្រោយ»។
លោកវេជ្ជបណ្ឌិត បានបញ្ជាក់ថា «បន្ទាប់ពីមន្រ្ដីជំនាញវេជ្ជសាស្រ្ដ បានធ្វើរោគវិនិច្ឆ័យយ៉ាងហ្មត់ចត់រួចមក រកឃើញថា អ្នកស្លាប់ចំនួន១៣នាក់ បានបង្កឡើង ដោយកត្តាផ្សេង មិនមែនពាក់ព័ន្ធនឹងការចាក់វ៉ាក់សាំងនោះទេ។ អ្នកស្លាប់ទាំងនោះ បានបង្កឡើងដោយជំងឺផ្សេង រួមមាន រោគសញ្ញាសរសៃឈាមស្រួចស្រាវ (Acute coronary syndrome) ចំនួន៨ករណី, ភាពស៊ាំ នៃប្រព័ន្ធភាពស៊ាំ (Immune Thrombotic Thrombocytopenic Purpura) ១ករណី, ជំងឺស្ទះសរសៃឈាមក្នុងសួត (Pulmonary embolism) ១ករណី, ជំងឺរលាកស្រោមខួរ (Purulent Meningitis) ១ករណី, ជំងឺប៉ោងសរសៃឈាមក្នុងពោះ (Intra-abdominal Aneurysm) ១ករណី និងជំងឺស្ទះសរសៃឈាមក្នុងខួរក្បាល (Brain Aneurysm ) ១ករណី។ ដោយឡែកអ្នកស្លាប់ចំនួន៥៥នាក់ផ្សេងទៀត កំពុងស្ថិតក្នុងស៊ើបអង្កេត ហើយនឹងរាយការណ៍ នៅសប្ដាហ៍ក្រោយ»។
លោកវេជ្ជបណ្ឌិត បានបន្ថែមថា «ចាប់ពីថ្ងៃទី២៨ ខែកុម្ភៈ ដល់ថ្ងៃទី១៦ ខែមិថុនា ឆ្នាំ២០២១ ប្រទេសថៃបានចាក់វ៉ាក់សាំងបង្ការកូវីដ-១៩ ជូនដល់ប្រជាពលរដ្ឋរបស់ខ្លួន ចំនួន ៧ ០០៣ ៧៨៣ដូស ហើយក្នុងនោះមាន ៣ ២១៤ ៣៨៥ដូស ជាវ៉ាក់សាំង Sinovac របស់ចិន»។
លោកវេជ្ជបណ្ឌិត បានបន្ថែមថា «ផលប៉ះពាល់ធ្ងន់ធ្ងរ ពីវ៉ាក់សាំង Sinovac បានជះឥទ្ធិពលដល់មនុស្ស៩៩៣នាក់ ដែលត្រូវសម្រាកព្យាបាល នៅមន្ទីរពេទ្យ ដោយធ្ងន់ធ្ងរ ឬស្មើនឹង២០ នាក់ ក្នុងការចាក់វ៉ាក់សាំង ចំនួន១០០ ០០០ដូស។ ចំណែកផលប៉ះពាល់ធម្មតា ពីវ៉ាក់សាំង Sinovac រួមមាន គ្រាន់តែវិលមុខ ចំនួន២០ភាគរយ, ក្អួតចង្អោរ ចំនួន១៥ភាគរយ, ឈឺក្បាល ចំនួន១២ភាគរយ, ហើមពោះ ៨ភាគរយ, អាការកន្ទួលលើស្បែក ៧ភាគរយ, ឈឺសាច់ដុំ ៦ភាគរយ, រាករុស ចំនួន៥ភាគរយ និងមានអាការរមាស់ ចំនួន៤ភាគរយ។
លោកវេជ្ជបណ្ឌិត បានបន្ថែមថា សម្រាប់ការចាក់វ៉ាក់សាំងបង្ការកូវីដ-១៩ AstraZeneca ចំនួន ១ ៩៤៣ ៦៩៣ដូស មានមនុស្សចំនួន៤៧២នាក់ ត្រូវបានបញ្ជូនទៅកាន់មន្ទីរពេទ្យ ក្រោយចាក់រួច ឬស្មើនឹងមនុស្ស២៤នាក់ ក្នុងចំណោមការចាក់វ៉ាក់សាំង ១០០ ០០០ដូស។ រីឯផលប៉ះពាល់ជាធម្មតា ពីការចាក់វ៉ាក់សាំង AstraZeneca រួមមាន គ្រុន ចំនួន៣១ភាគរយ, ឈឺក្បាល ២៧ភាគរយ, វិលមុខ ២១ភាគរយ, ចង្អោរ ២១ភាគរយ, ក្អូត ២០ភាគរយ, ឈឺសាច់ដុំ ១៥ភាគរយ, អស់កម្លាំង ១៣ភាគរយ និងរាករុស ៧ភាគរយ។
លោក Jadej Thammatacharee អគ្គលេខាធិការ នៃការិយាល័យសន្ដិសុខសុខាភិបាលជាតិ (NHSO) បានបញ្ជាក់ថា បើតាមច្បាប់កំណត់ គឺអ្នកដែលរងផលប៉ះពាល់ក្រោយការចាក់វ៉ាក់សាំងបង្ការកូវីដ-១៩។ អ្នកដែលទទួលបានសំណង ចំពោះផលប៉ះពាល់ នៃការចាក់វ៉ាក់សាំងបង្ការកូវីដ-១៩ ពី NHSO រួមមាន៖
១-ករណីស្លាប់ ឬពិការអចិន្រ្ដៃយ៍ ត្រូវទទួលសំណង ចំនួន ៤០០ ០០០បាត (ប្រាក់ថៃ) ឬស្មើនឹង ១២ ៧៨៧ដុល្លារអាមេរិក។
២-បាត់បង់សរីរាង្គ ឬពិការ ត្រូវទទួលបានសំណងជាអតិបរមា ២៤០ ០០០បាត ឬស្មើនឹង៧ ៦៧២ដុល្លារអាមេរិក។
៣-ប៉ះពាល់ដល់សុខភាព ដែលត្រូវការការព្យាបាលតាមវេជ្ជសាស្រ្ត អ្នកទទួលវ៉ាក់សាំងនឹងមានសិទ្ធិទទួលបានសំណង រហូតដល់១សែនបាត ឬស្មើនឹង ៣ ១៩៦ដុល្លារអាមេរិក។
លោកអគ្គលេខាធិការ បានបន្ថែមថា ជំនួយហិរញ្ញវត្ថុពិតប្រាកដ អាស្រ័យទៅលើវិសាលភាព នៃផលប៉ះពាល់ពីវ៉ាក់សាំងបង្ការកូវីដ-១៩នេះ។ អ្នកដែលសង័្សយលើវ៉ាក់សាំងបង្ការកូវីដ-១៩ ដែលបង្កឲ្យកើតជាជំងឺ ឬស្លាប់ អាចដាក់ពាក្យស្នើសុំភ្លាមៗ ដោយមិនចាំបាច់រង់ចាំការផ្ទៀងផ្ទាត់ ព្រោះវាជាជំនួយដំបូង ដែលមិនត្រូវការភស្តុតាង»។
លោកអគ្គលេខាធិការ NHSO បានបន្ដថា «ទោះបីជាការស៊ើបអង្កេតតាមផ្នែកវេជ្ជសាស្រ្តសន្និដ្ឋាន នាពេលក្រោយ រកឃើញថា ករណីនេះមិនបានបង្កឡើង ដោយសារវ៉ាក់សាំងបង្ការកូវីដ-១៩ ក៏ដោយ ក៏យើងនឹងមិនទាមទារសំណងពីអ្នកទាំងនោះវិញដែរ»៕