រាជធានីបាងកក៖ ប្រទេសជាច្រើន នៅក្នុងតំបន់អាស៊ី-ប៉ាស៊ីហ្វិក កំពុងតែបង្កើនល្បឿន សម្រាប់ការបើកទ្វារប្រទេស និងស្ដារសេដ្ឋកិច្ចឡើងវិញ នៅឆ្នាំ២០២២ខាងមុន ស្របគ្នានេះដែរប្រទេសថៃ បច្ចុប្បន្នកំពុងតែដើរយឺតជាងបណ្ដាប្រទេសទាំងនោះ នៅក្នុងការធ្វើលទ្ធកម្មវ៉ាក់សាំង ហើយយុទ្ធនាការចាក់វ៉ាក់សាំង ក៏មានការយឺតយ៉ាវ ដែលនាំឲ្យប៉ះពាល់ដល់ការស្តារសេដ្ឋកិច្ចរបស់ប្រទេសឡើងវិញ។
រហូតមកដល់ពេលនេះ ថៃបានឈានចូលដល់សប្តាហ៍ទី២ នៃការចាក់វ៉ាក់សាំង AstraZeneca ដែលផលិតក្នុងប្រទេសរបស់ខ្លួន ហើយវាហាក់បីដូចជា ការផ្គត់ផ្គង់កំពុងធ្លាក់ចុះមិនអាចបំពេញតាមតម្រូវការរបស់ប្រទេសបាន។
ដោយឡែករដ្ឋាភិបាលថៃ បានបញ្ជាក់ថា រដ្ឋាភិបាល នឹងផលិតវ៉ាក់សាំងបង្ការកូវីដ-១៩ ចំនួន៦លានដូស នៅក្នុងមិថុនា និង១០លានដូស ក្នុងមួយខែ ចាប់ពីខែកក្កដា ដល់ខែវិច្ឆិកា ហើយ៥លានដូស នៅក្នុងខែធ្នូ។ ប៉ុន្ដែបើតាមសេចក្ដីរាយការណ៍របស់សារព័ត៌មានបាងកកប៉ុស្ដិ៍ បានឲ្យដឹងថា បច្ចុប្បន្ន មជ្ឈមណ្ឌលគ្រប់គ្រង់ស្ថានភាពកូវីដ-១៩ (CCSA) បានទទួលស្គាល់ថា មានការខ្វះខាតវ៉ាក់សាំង ដោយមិនអាចផ្គត់ផ្គង់បាន នៅក្នុងសប្ដាហ៍នេះ។
លោកឧត្ដមសេនីយ៍ Nattapon Nakpanich ដែលរៀបចំប្រតិបត្ដិការប្រចាំថ្ងៃរបស់ CCSA បានថ្លែង កាលពីថ្ងៃទី១៤ ខែមិថុនា ថា នៅក្នុងសប្ដាហ៍នេះថ មិនមានវ៉ាក់សាំង សម្រាប់ផ្គត់ផ្គង់នោះទេ។ ទោះជាយ៉ាងណា លោកនៅតែមានទំនុកចិត្តទៅលើគោលដៅកំណត់ថា នៅខែនេះនឹងមានវ៉ាក់សាំង ចំនួន៦លានដូស សម្រាប់ចាក់ជូនដល់ប្រជាពលរដ្ឋ។
នៅក្នុងសេចក្ដីថ្លែងការណ៍មួយ ដែលបានចេញផ្សាយ កាលពីចុងសប្ដាហ៍មុន បណ្ដាញវេជ្ជបណ្ឌិត ដែលកំពុងធ្វើការ នៅក្នុងមន្ទីរពេទ្យតាមជនបទរបស់ប្រទេសថៃ ព្យាករពីភាពវឹកវរ នៅសប្តាហ៍នេះ នៅពេលការកំណត់ នៃការចាក់វ៉ាក់សាំងបន្ថែម នឹងត្រូវពន្យារពេល ហើយមនុស្សជាច្រើន នឹងខកបំណង ក្នុងការទទួលបានការចាក់វ៉ាក់សាំង។
ធនាគារថៃ កាលពីមុន បានប៉ាន់ប្រមាណ អំពីកំណើនផលិតផលក្នុងស្រុកសរុប ( GDP) កើនឡើងដល់៣ភាគរយ មុនពេលរលកទី៣ នៃជំងឺកូវីដ-១៩ ចាប់ផ្ដើមផ្ទុះឡើង នៅក្នុងប្រទេសថៃ នាអំឡុងខែមេសា។ ប៉ុន្ដែនៅពេលនេះ ធនាគារថៃ នឹងបញ្ចូលសេណារីយ៉ូ ចំនួន៣ផ្សេងគ្នា ដែលកំណត់គោលដៅកំណើន GDP ចន្លោះពី ១-២ភាគរយ ដោយពឹងផ្អែកទៅលើយន្ដការចាក់វ៉ាក់សាំងរបស់ប្រទេសនេះ។
សម្រាប់សេណារីយ៉ូជាមូលដ្ឋាន ធនាគារថៃព្យាករកំណើនផលិតផលក្នុងស្រុកសរុប (GDP) នឹងកើន២ភាគរយ ដោយសារសន្មតថា លទ្ធកម្ម និងការចែកចាយវ៉ាក់សាំងបង្ការកូវីដ-១៩ នឹងកើនដល់១០០លានដូស នៅក្នុងឆ្នាំនេះ។
បើតាមក្រសួងទេសចរណ៍ និងកីឡា ថា នៅក្នុងឆ្នាំ២០១៩ ភ្ញៀវទេសចរបានមកលេងប្រទេសថៃ មានចំនួន ៣៩,៩លាននាក់ ដោយរកចំណូលបាន ចំនួន២លានលានបាត (លុយថៃ) ឬស្មើនឹង៦៣៨ ២២៤ ៣៣៨ ៨៧២ ដុល្លារសហរដ្ឋអាមេរិក។ ប៉ុន្ដែកាលពីឆ្នាំ២០២០កន្លងទៅ ចំនួនភ្ញៀវទេសចរបានមកដល់ប្រទេសថៃ បានធ្លាក់ចុះមកនៅត្រឹម ៦,៧លាននាក់ ហើយថៃបានប៉ាន់ប្រមាណថា នឹងមានភ្ញៀវទេសចរបរទេស ចន្លោះពី២០០ ០០០ទៅ៣០០ ០០០នាក់ នៅក្នុងឆ្នាំនេះ។
ទោះជាយ៉ាងណារដ្ឋាភិបាលថៃ បានបញ្ជាក់ពីគម្រោងបើកទ្វារប្រទេស សម្រាប់ភ្ញៀវបរទេស ដោយចាប់ផ្ដើមពីខេត្តភូកេត នៅថ្ងៃទី១ ខែកក្កដា ខាងមុខនេះ។ ដើម្បីសម្រេចបានតាមគោលដៅបើកទ្វារប្រទេសឲ្យមានសុវត្ថិភាពនោះ រដ្ឋាភិបាលថៃបានបង្កើនការចាក់វ៉ាក់សាំង និងបញ្ជាទិញវ៉ាក់សាំងបង្ការកូវីដ-១៩របស់អាមេរិក Pfizer ចំនួន២០លានដូសបន្ថែមទៀត៕