ហុងកុង៖ អាជ្ញាធរហុងកុង កាលពីព្រឹក ថ្ងៃទី១៧ ខែមិថុនា បានបញ្ជូនប៉ូលិស ប្រហែល៥០០នាក់ ឆ្មក់ចូលបង្រ្កាបការិយាល័យកាសែតគាំទ្រលទ្ធិប្រជាធិបតេយ្យ (App Daily) ក្រោមការចោទប្រកាន់ អំពីសេចក្ដីរាយការណ៍របស់កាសែតនេះ បានរំលោភលើច្បាប់សន្ដិសុខជាតិ ដែលតាក់តែងឡើង ដោយរដ្ឋាភិបាលទីក្រុងប៉េកាំង សម្រាប់បង្ក្រាបទៅលើចលនាគាំទ្រលទ្ធិប្រជាធិបតេយ្យ នៅលើដែនកោះរបស់អតីតអាណានិគមរបស់ចក្រភពអង់គ្លេសមួយនេះ។
សារព័ត៌មាន BBC បានចេញផ្សាយ នៅព្រឹក ថ្ងៃទី១៧ ខែមិថុនា ថា ប៉ូលិសប្រហែល៥០០នាក់ កាលពីព្រឹកមិញ (ថ្ងៃព្រហស្បតិ៍ ទី១៧ ) បានឆ្មក់ចូលការិយាល័យកាសែត Apple Daily ដែលមានទំនោរទៅរកលទ្ធិប្រជាធិបតេយ្យ នៅក្នុងទីក្រុងហុងកុង។ អាជ្ញាធរបានចោទប្រកាន់កាសែត Apple Daily ពីសេចក្ដីរាយការណ៍របស់កាសែតនេះ បានរំលោភទៅលើច្បាប់សន្ដិសុខជាតិ។
សារព័ត៌មាន BBC បានរាយការណ៍បន្ដថា ក្រៅពីសកម្មភាពឆ្មក់ចូលការិយាល័យសារព័ត៌មាន Apple Daily នោះ ប៉ូលិសបានបំបែកគ្នាជាច្រើនក្រុម ចូលចាប់ខ្លួននាយកនិយពន្ធ និងថ្នាក់ដឹកនាំ៤នាក់ផ្សេងទៀត នៅតាមផ្ទះរបស់ពួកគេ។ ជាមួយគ្នានេះ អាជ្ញាធរហុងកុង ក៏បានបង្កលុយ ចំនួន១៨លានដុល្លារហុងកុង ឬស្មើនឹង២,៣លានដុល្លារសហរដ្ឋអាមេរិក ដែលជាទ្រព្យសម្បត្ដិរបស់ក្រុមហ៊ុនចំនួន៣ ពាក់ព័ន្ធនឹងសារព័ត៌មាន Apple Daily នេះ។
មន្រ្ដីសន្តិសុខជាតិរបស់កោះហុងកុង បានប្រកាសថា ថ្នាក់ដឹកនាំទាំង៥រូប នៃសារព័ត៌មាន Apple Daily ត្រូវបានចាប់ខ្លួន ដោយសារពួកគេបានធ្វើសកម្មភាព ពាក់ព័ន្ធនឹងគំរាមកំហែងដល់សន្តិសុខជាតិ។ ក្នុងចំណោមថ្នាក់ដឹកនាំ៥នាក់ នៃសារព័ត៌មាន Apple Daily នោះ រួមមាន បុរស៤នាក់ និងស្ត្រីម្នាក់ ដោយមានអាយុ ចន្លោះពី៤៧-៦៣ឆ្នាំ។
សារព័ត៌មាន Apple Daily បានផ្សាយថា ថ្នាក់ដឹកនាំ នៃសារព័ត៌មាន ដែលត្រូវចាប់ខ្លួននោះ រួមមាន និពន្ធនាយកម្នាក់ និងលេខា៤នាក់។ ថ្នាក់ដឹកនាំទាំងនោះ មានការងារទទួលបន្ទុកផ្នែកព័ត៌មានផ្សេងៗគ្នា។ កម្លាំងប៉ូលិសបានយកដីកា ចូលមកឆែកឆេរការិយាល័យនិពន្ធរបស់សារព័ត៌មាន Apple Daily ។ សកម្មភាពខាងលើនេះ គឺជាការវាយប្រហារមកលើស្ថាប័នសារព័ត៌មាន Apple Daily ក្រោយពេលរដ្ឋាភិបាលហុងកុង បានបង្កកទ្រព្យសម្បត្តិរបស់អគ្គនាយក Jimmy Lai ដែលកំពុងតែជាប់ឃុំ។
លោក Jimmy Lai ជាសេដ្ឋី និងជាម្ចាស់កាសែត Apple Daily នៅហុងកុង ត្រូវបានចាប់ខ្លួន កាលពីខែសីហា ឆ្នាំ២០២០ ហើយកាត់ទោស ក្រោមច្បាប់សន្តិសុខជាតិ ដែលតាក់តែងឡើង ដោយរដ្ឋាភិបាលទីក្រុងប៉េកាំង សម្រាប់ជាឧបករណ៍បង្រ្កាបទៅលើអ្នកគាំទ្រលទ្ធិប្រជាធិបតេយ្យ នៅលើកោះហុងកុង។ ក្រៅពីនេះ អាជ្ញាធរក៏បានបង្កកទ្រព្យសម្បត្តិទាំងអស់របស់អ្នកតស៊ូ ដើម្បីប្រជាធិបតេយ្យ នៅហុងកុង ផងដែរ។
ដោយឡែកប៉ូលិស បានថ្លែង នៅក្នុងសន្និសីទសារព័ត៌មានខ្លីមួយ ថា ចាប់តាំងពីឆ្នាំ២០១៩មក សារព័ត៌មាន Apple Daily បានបោះពុម្ពផ្សាយជាង៣០អត្ថបទ ដោយអំពាវនាវដល់ប្រទេសនានា ឲ្យដាក់ទណ្ឌកម្មដល់ទីក្រុងហុងកុង និងប្រទេសចិន។ បន្ថែមពីលើនេះ ទ្រព្យសម្បត្ដិរបស់ក្រុមហ៊ុន Apple Daily Limited, Apple Daily Printing Limited និងក្រុមហ៊ុន AD internet Limited ត្រូវបានបង្កកផងដែរ។
ប៉ូលិសហុងកុង បានបញ្ជាក់ថា ប៉ូលិសជាច្រើនក្រុមបានសំដៅទៅផ្ទះរបស់លោកនាយកនិពន្ធកាសែត Apple Daily គឺលោក Ryan Law, ផ្ទះលោក Cheung Kim-hung ប្រធានក្រុមហ៊ុន Next Digital,ផ្ទះរបស់ COO Chow Tat-kuen, ផ្ទះរបស់ចាងហ្វាង Apple Daily គឺលោក Chan Pui-man និងលោកនាយក Cheung Chi-wai ហើយប៉ូលិសបានចាប់ខ្លួនពួកគេទាំងអស់គ្នា៕