រាជធានីបាងកក៖ រហូតមកដល់ពេលនេះ បណ្ដាអង្គការនានា នៅក្នុងប្រទេសថៃ បានចុះឈ្មោះស្នើសុំទិញវ៉ាក់សាំងបង្ការកូវីដ-១៩របស់ចិន សម្រាប់ចាក់ជូនដល់បុគ្គលិករបស់ខ្លួន សរុប ជាង៣លាននាក់។
សារព័ត៌មាន The Nation បានចេញផ្សាយ នៅថ្ងៃអង្គារ (ទី១៥ ខែមិថុនា) ថា រាជបណ្ឌិត្យសភា Chulabhorn (CRA) បានបញ្ជាក់ កាលពីថ្ងៃចន្ទ ថា នៅថ្ងៃដំបូងនេះ មានអង្គការចំនួន ៦ ៩៣៨ បានចុះឈ្មោះស្នើសុំទិញវ៉ាក់សាំងបង្ការកូវីដ-១៩ Covilo ពីក្រុមហ៊ុន Sinopharm របស់ចិន សម្រាប់ចាក់ជូនបុគ្គលិករបស់ខ្លួន សរុប ៣,១៨លាននាក់។ រីឯ CRA បានចាប់ផ្ដើមបើកការចុះឈ្មោះជូនដល់អថិជន មកពីអង្គការនានា នៅថ្ងៃទី១៤ ខែមិថុនា ចាប់ពីវេលាម៉ោង៨ព្រឹក ដល់ម៉ោង៤ល្ងាច។ CRA នឹងនាំចូល ហើយលក់វ៉ាក់សាំង Covilo របស់ក្រុមហ៊ុន Sinopharm ក្នុងតម្លៃ៨៨៨បាត (ប្រាក់ថៃ) ឬស្មើនឹង២៨ដុល្លារ ក្នុង១ដូស។ តម្លៃនេះ រួមទាំងថ្លៃការដឹកជញ្ជូន ថ្លៃស្ដុក និងថ្លៃធានារាប់រង ក្នុងករណីមានផលប៉ះពាល់ពីវ៉ាក់សាំងផងដែរ។
រាជបណ្ឌិត្យសភា CRA បានបញ្ជាក់ថា អ្នកចុះឈ្មោះទិញត្រូវបញ្ជាក់ អំពីចំនួនដូស ដែលពួកគេត្រូវការ សម្រាប់ចាក់ជូនបុគ្គលិក ហើយរាជបណ្ឌិត្យសភា នឹងទាក់ទងទៅពួកគេ ក្នុងថ្ងៃធ្វើការចំនួន៥ថ្ងៃ ដើម្បីជូនដំណឹង អំពីចំនួនដែលអាចត្រូវបានបែងចែក វិធីសាស្រ្តទូទាត់ប្រាក់ កាលបរិច្ឆេទចាក់វ៉ាក់សាំង និងទីកន្លែង។ រីឯវ៉ាក់សាំងនេះ ត្រូវបានទទួលស្គាល់ ដោយអង្គការសុខភាពពិភពលោក (WHO) និងរដ្ឋបាលចំណីអាហារ និងឱសថ (FDA) សម្រាប់ការប្រើប្រាស់ នៅក្នុងប្រទេសថៃ។
រាជបណ្ឌិត្យសភា CRA បានបន្ថែមថា ការចាក់វ៉ាក់សាំង Covilo របស់ក្រុមហ៊ុន Sinopharm គឺមានចំនួន២ដូស ដោយមានរយៈពេល ចន្លោះគ្នាពី៣-៤សប្ដាហ៍។ វ៉ាក់សាំងនេះអាចស្ដុកទុក នៅក្នុងសីតុណ្ហភាព ចន្លោះពី២-៨អង្សា (2-8 degrees Celsius)។ ក្រុមហ៊ុនចិនមួយនេះបានបញ្ចេញវ៉ាក់សាំងបង្ការកូវីដ-១៩ ចំនួន៦៥លានដូសទៅកាន់ប្រទេសចំនួន៥៧ នៅលើពិភពលោក ដោយវាមានប្រសិទ្ធភាព ៧៨,១ភាគរយ ហើយវាអាចទប់ទល់នឹងរោគសញ្ញាធ្ងន់ធ្ងរ និងបង្កឲ្យស្លាប់ រហូតដល់១០០ភាគរយ៕
