ក្នុងកាលៈទេសៈនេះជឿថាបងប្អូនពេកជាមានការលំបាកក្នុងការចេញទៅញ៉ាំរបស់នៅខាងក្រៅ ដោយសារតែឆ្លងកូវីដខ្លាំង។ ប៉ុន្ដែបងប្អូនកុំបារម្ភអី ថ្ងៃនេះយើងនឹងណែនាំបងប្អូនពីរបៀបបុកងាវឱ្យឆ្ងាញ់ដូចក្នុងហាងបាន។
គ្រឿងផ្សំ៖ ងាវ ១គីឡូ,ប៉េងប៉ោះ ២-៣ផ្លែល្មម,ត្រប់ស្រួយ ២-៣ផ្លែល្មម,សណ្តែកកួរ ៣-៥កួរ,ក្រូចឆ្មារ ២ផ្លែ,ខ្ទឹមស ម្ទេសគ្រាប់ ម្ទេសក្រៀម (ដាក់តាមចំណូលចិត្ត),ស្ករត្នោត ១ស្លាបព្រាបាយ,ទឹកត្រី ២ស្លាបព្រាបាយ,ទឹកកាពិ ឬទឹកប្រហុក(តាមការចូលចិត្ត) ៥-៦ស្លាបព្រាបាយ។
វិធីធ្វើ៖
១.យកងាវលាងអោយស្អាត រួចយកទៅដាក់ស្រុះមួយសន្ទុះ ហើយស្រង់ចេញយកមកបកទុកមួយឡែក។
២.យកត្បាល់ដាក់ខ្ទឹមស ម្ទេសគ្រាប់ និងម្ទេសក្រៀមបុកចូលគ្នាឲ្យសព្វ រួចដាក់ស្ករត្នោត ទឹកត្រី ទឹកកាពិ ឬទឹកប្រហុក ច្របាច់ក្រូចឆ្មារចូលបុកចូលគ្នាឲ្យសព្វ។
៣.បន្ទាប់មកចិតប៉េងប៉ោះ និងត្រប់ស្រួយជាចំណិតៗ កាត់សណ្តែកកួរខ្លីៗល្មម ដាក់ចូលបុកចូលគ្នា រួចដាក់ងាវចូល ច្របល់ចូលគ្នាអោយសព្វ ដួសដាក់ចានជាការស្រេច៕
