រដ្ឋធានីប៉េកាំង៖ ការផ្ទុះហ្គាស នៅខេត្តហ៊ូប៉ី (Hubei) នាភាគកណ្ដាល ប្រទេសចិន កាលពីព្រឹក ថ្ងៃអាទិត្យ (ទី១៣ ខែមិថុនា ឆ្នាំ២០២១) បានបណ្ដាលឲ្យមានមនុស្ស១២នាក់បាត់បង់ជីវិត និងជាង១០០នាក់ផ្សេងទៀត រងរបួស។
សារព័ត៌មានចិន (Chaina Daily) បានផ្សាយថា អាជ្ញាធរក្នុងតំបន់បានបញ្ជាក់ថា ការផ្ទុះហ្គាស នៅក្នុងខេត្តហ៊ូប៉ី កាលពីព្រឹក ថ្ងៃទី១៣ ខែមិថុនា បានបណ្ដាលឲ្យមានអ្នកស្លាប់ ចំនួន១២នាក់ ហើយមនុស្សជាង១០០នាក់ផ្សេងទៀត រងរបួស ក្នុងនោះមានអ្នករងរបួសធ្ងន់ ចំនួន៣៩នាក់។
បើតាមទីបញ្ជាការជួយសង្រ្គោះ បានឲ្យដឹងថា គិតត្រឹមវេលាម៉ោង១២រសៀល ថ្ងៃដដែលនោះ ក្រុមអ្នកជួយសង្រ្គោះបានរកឃើញមនុស្ស១៥០នាក់ ហើយនាំចេញពីកន្លែងផ្ទុះ ស្ថិតក្នុងទីក្រុង Shiyan ខេត្តហ៊ូប៉ី ហើយបញ្ជូនពួកគេទៅកាន់មន្ទីរពេទ្យ។
ទីបញ្ជាការជួយសង្រ្គោះ បានបញ្ជាក់ថា ឧប្បត្តិហេតុនេះ បានកើតឡើង នៅក្នុងសហគមន៍លំនៅឋានមួយ ស្ថិតក្នុងខណ្ឌ Zhangwan ក្រុង Shiyan ខេត្តហ៊ូប៉ី (Hubei) នាវេលាម៉ោង៦ និង ៣០ នាទីព្រឹក ថ្ងៃអាទិត្យ ទី១៣ ខែមិថុនា។ នៅក្នុងហេតុការណ៍នោះ បានបណ្ដាលឲ្យមនុស្សជាច្រើននាក់ជាប់ នៅក្នុងអគារនោះ។
ទោះជាយ៉ាងណា អាជ្ញាធរមិនទាន់បានបញ្ជាក់អំពីឧប្បត្ដិហេតុនេះនៅឡើយ ហើយករណីនេះកំពុងស្ថិតក្នុងការស៊ើបអង្កេត៕
