រាជធានីភ្នំពេញ៖ គណៈបញ្ជាការឯកភាពខណ្ឌព្រែកព្នៅ ដឹកនាំដោយ លោក សុខ សម្បត្តិ អភិបាល នៃគណៈអភិបាលខណ្ឌព្រែកព្នៅ សហការណ៍ជាមួយ ឧត្តមសេនីយ៍ទោ ចេវ ហាក់ ស្នងការរងនគរបាលរាជធានីភ្នំពេញ បានចុះអនុវត្តតាមលិខិតលេខ ០៣៨/២១ សជណ.ច ចុះថ្ងៃទី០២ ខែមិថុនា ឆ្នាំ២០២១ របស់រដ្ឋបាលរាជធានីភ្នំពេញ ស្តីពីការរុះរើ ឬចល័តបែចិញ្ជឹមត្រី ផ្ទះបណ្ដែតទឹក ផ្ទះទូកតូចៗ និងសំណង់មិនរៀបរយលើផ្ទៃទឹក នៅភូមិសាស្ត្រសង្កាត់សំរោង៨១% និងសង្កាត់ព្រែកព្នៅ៧៤.៥% នាថ្ងៃទី១២ខែមិថុនា ឆ្នាំ២០២១។
ជាលទ្ធផលបានរុះរើ និងចល័តដោយស្ម័គ្រចិត្តក្នុងនោះ ទី១.សង្កាត់ព្រែកព្នៅ មានសរុប២៥៩បែ បានរុះរើ និងចល័តចេញ ចំនួន១៩៣បែ គិតជាភាគរយស្មើរនឹង៧៤.៥% ទី២.សង្កាត់សំរោង មានសរុប៦៣បែ បានរុះរើ និងចល័តចេញចំនួន៥១បែ គិតជាភាគរយស្មើនឹង៨១%។
ក្នុងនោះ ផ្ទះដែលបានរុះរើខ្លះបានទៅជួលផ្ទះនៅតាមតាមភូមិដើម្បីរស់នៅ និងផ្ទះចល័តទាំងអស់ត្រូវបានអាជ្ញាធរនាំយកទៅដាក់នៅជាប់ប្រទល់ខេត្តកណ្តាល បណ្តោះអាសន្នសិន សរុបផ្ទះ និងបែដែលមកពីកន្លែងផ្សេង និងនៅក្នុងខណ្ឌព្រែកព្នៅ សរុបកើនឡើងចំនួនជាង៣០០ផ្ទះ និងបែចិញ្ចឹមត្រី ហើយផ្ទះដែលនៅសល់បានយល់ព្រមរុះរើជាបន្តើរៗបន្តទៀត ៕