វៀតណាម៖ (បកប្រែក្រៅផ្លូវការ) យោងតាមការចុះផ្សាយរបស់សារព័ត៌មាន Zing លោកស្រី Le Thi Thu Hang បាននិយាយថា៖ ប្រទេសវៀតណាមគាំទ្រការអនុវត្តិ ការរៀបចំដងទន្លេឲ្យមានសណ្តាប់ធ្នាប់ និងបរិស្ថាន របស់រដ្ឋបាលរាជធានីភ្នំពេញ ទៅលើជនជាតិវៀតណាមដែលតាំងទីលំនៅ នៅតាមដងទន្លេរក្នុងរាជធានីភ្នំពេញ ប៉ុន្តែសំណូមពរត្រូវតែគោរពតាមគោលនយោបាយមនុស្សធម៌ ទៅលើពលរដ្ឋវៀតណាមផង។
លោកស្រីបានលើកឡើងថា ក្រសួងការបរទេសវៀតណាម ចាប់អារម្មណ៍យ៉ាងខ្លាំងចំពោះព័ត៌មានដែលថាអាជ្ញាធររាជធានីភ្នំពេញ សម្រេចផ្លាស់ប្តូរទីលំនៅប្រជាជនវៀតណាម ដែលរស់នៅតាមដងទន្លេ ក្នុងភូមិសាស្ត្ររាជធានីភ្នំពេញ។ ឆ្លៀតក្នុងឱកាសនោះដែរលោកស្រីក៏បង្ហាញពីការគាំទ្រទៅលើសេចក្ដីសម្រេចរបស់ភាគីសាលារាជធានីភ្នំពេញផងដែ និងសំណូមពរអោយការបំលាស់ទី ផ្ទះបណ្តែតទឹក បែចិញ្ចឹមត្រីជាដើម នៅលើផ្ទៃទឹកក្នុងភូមិសាស្ត្ររាជធានីភ្នំពេញ អនុវត្តទៅតាមលក្ខខណ្ឌដែលសមស្រប។
លោកស្រី អ្នកនាំពាក្យក្រសួងការបរទេសវៀតណាមបាននិយាយបន្ថែមទៀតថា ប្រទេសវៀតណាមបានយល់ពីគោលនយោបាយនៃអភិវឌ្ឍន៍សង្គមសេដ្ឋកិច្ច ការរៀបចំសណ្តាប់ធ្នាប់ ការការពារបរិដ្ឋាន នៅតាមដងទន្លេ ដើម្បីបង្កើនសោភណ័ភាពទីក្រុងរបស់រដ្ឋបាលរាជធានីភ្នំពេញ ហើយសង្ឃឹមថាការតាំងទីលំនៅថ្មីរបស់ពលរដ្ឋវៀតណាមទាំងនោះ នឹងត្រូវបានអនុវត្តដោយមានកាលបរិច្ឆេទសមហេតុសមផល និងឆាប់ជួយឲ្យជនជាតិវៀតណាមទាំងនោះបានវិលត្រឡប់ទៅរកស្ថេរភាពដូចដើមវិញ ក៏ដូចជាធានាបាននូវសន្តិសុខពេញលេញដល់ពួកពលរដ្ឋវៀតណាមទាំងនោះផងដែរ ។
ប្រភពខាងលើបានអោយដឹងទៀតថាទាក់ទងជាមួយចំណាត់ការរបស់សាលារាជធានីភ្នំពេញ ទៅលើការរុះរើផ្ទះបណ្ដែតទឹករបស់ជនជាតិវៀតណាមតាមដងទន្លេ ក្នុងភូមិសាស្ត្ររាជធានីភ្នំពេញនេះដែរ គណកម្មការពលរដ្ឋវៀតណាម និងស្ថានទូតវៀតណាមប្រចាំប្រទេសកម្ពុជា ក៏បានស្នើដល់ភាគីកម្ពុជា ធ្វើយ៉ាងណា ត្រូវបង្កើតឲ្យមានលក្ខខណ្ឌអំណោយផល និងចាត់វិធានការសមស្រប ដើម្បីគាំទ្រដល់ពលរដ្ឋវៀតណាមសម្រាប់តាំងលំនៅឋានថ្មី និងត្រូវតែប្រកាន់យកគោលនយោបាយមនុស្សធម៌ ។
អ្នកនាំពាក្យ ក្រសួងការបរទេសលោកស្រី Le Thi Thu Hang ដដែលបាននិយាយថា បញ្ហានេះក៏ត្រូវបានលើកឡើងនៅក្នុងកិច្ចប្រជុំទ្វេភាគីរវាងរដ្ឋមន្ត្រី Bui Thanh Son និងឯកឧត្ដម ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ រួចរាល់ហើយដែរ ។
បើតាមលោកស្រី Le Thi Thu Hang បានបង្ហាញថា សំណើរខាងលើនេះ ភាគីកម្ពុជាក៏បានទទួលស្គាល់ និងសន្យាថា នឹងបន្តយកចិត្តទុកដាក់ និងបង្កើតលក្ខខណ្ឌអំណោយផលសម្រាប់ប្រជាជន និស្សិត និងអាជីវកម្មវៀតណាម ដើម្បីរស់នៅក្នុងប្រទេសកម្ពុជាបន្តទៀត ។
គួរឲ្យដឹងថា សាលារាជធានីភ្នំពេញ កាលពីថ្ងៃពុធ ទី ០២ ខែមិថុនា ឆ្នាំ ២០២១ បានចេញសេចក្ដីជូនដំណឹងមួយ ស្ដីពីការរុះរើ ឬចល័តបែចិញ្ចឹមត្រី ផ្ទះបណ្ដែតទឹក ផ្ទះទូកតូចៗ និងសំណង់មិនរៀបរយចេញពីផ្ទៃទន្លេ នៅក្នុងភូមិសាស្ត្ររាជធានាភ្នំពេញ ។
ការអនុវត្តរុះរើនេះផងដែរ រដ្ឋបាលរាជធានីភ្នំពេញ បានទុករយៈពេលត្រឹមតែ ១សប្ដាហ៍ ដោយគិតចាប់ពីថ្ងៃជូនដំណឹងតទៅ ។ ប្រសិនបើផុតរយៈពេលនេះ រដ្ឋបាលរាជធានីភ្នំពេញនឹងចាត់វិធានការរដ្ឋបាល ដោយពុំទទួលខុសត្រូវរាល់ការខូចខាតឡើយ ៕
ប្រភព៖ zing
