រដ្ឋធានីវ៉ាស៊ីនតោន៖ កំពូលមហាសេដ្ឋីលេខនៅលើពិភពលោករបស់សហរដ្ឋអាមេរិក បានប្រកាស កាលពីថ្ងៃទី៧ ខែមិថុនា ថា លោកនឹងហោះហើរទៅកាន់ទីអវកាស នៅខែក្រោយ ជាជើងហោះហើររបស់មនុស្សលើកដំបូង ដែលចាប់ផ្តើម ដោយក្រុមហ៊ុនរ៉ុក្កែត Blue Origin របស់លោក។
លោក Jeff Bezos ជាមហាសេដ្ឋីលេខ១ នៅលើពិភពលោក និងជាស្ថាបនិកក្រុមហ៊ុន Amazon បានបញ្ជាក់ នៅតាមគណនីបណ្ដាញសង្គម Instagram ថា« ចាប់តាំងពីខ្ញុំមានអាយុ៥ឆ្នាំ ខ្ញុំមានក្ដីស្រមៃមួយ ចង់ធ្វើដំណើរទៅកាន់ទីអវកាស។ ដូច្នេះ នៅថ្ងៃទី២០ ខែកក្កដា ខ្ញុំនឹងធ្វើដំណើរទៅកាន់ទីនោះជាមួយនឹងបងប្រុសរបស់ខ្ញុំ»។
ក្រុមហ៊ុន Blue Origin បានបញ្ជាក់ថា លោក Bezos និងបងប្រុសរបស់គាត់ ឈ្មោះ Mark នឹងធ្វើដំណើរតាមជើងហោះហើរលើកដំបូង នៅលើយាន New Shepard របស់ក្រុមហ៊ុន។ ក្រុមហ៊ុនកំពុងតែដេញថ្លៃកន្លែងទីបី ហើយការដេញថ្លៃនេះ មានតម្លៃ២,៨ លានដុល្លារ ដោយមានអ្នកចូលរួមជិត ៦០០០នាក់ មកពីប្រទេសចំនួន១៤៣។
ទស្សនាវដ្ឋី Forbes បានឲ្យដឹងថា គិតត្រឹមខែមេសា ឆ្នាំ២០២១ លោក Jeff Bezos (Jeffrey Preston Bezos ) មានទ្រព្យសម្បត្ដិ រហូតដល់ទៅជាង ២០០ពាន់លានដុល្លារសហរដ្ឋអាមេរិក។ លោក Jeff Bezos ក្លាយជាមហាសេដ្ឋីលេខ១ នៅលើពិភពលោក៕