បរទេស៖ កងទ័ពអ៊ីស្រាអែល បានវាយប្រយុទ្ធគ្នាជាមួយនឹងក្រុមហាម៉ាសយ៉ាងខ្លាំង ហើយកាលពីព្រឹក ថ្ងៃសុក្រ ទី១៤ ខែឧសភា ឆ្នាំ២០២១ បានបន្ដឆ្លងចូលកាន់កាប់តំបន់ Gaza Strip ដោយមានការបាញ់គាំទ្រពីកងកាំភ្លើងធំ រថក្រោះ និងយន្ដហោះចម្បាំង ទៅលើដែនដីរបស់ប៉ាឡេស្ទីន។
ស្រ្ដីអ្នកនាំពាក្យកងទ័ពអ៊ីស្រាអែល បានប្រកាសថា កងទ័ពអាកាស និងទ័ពថ្មើរជើងរបស់អ៊ីស្រាអែល បានចូលរួមការវាយប្រហារទៅលើតំបន់ Gaza ។ ប៉ុន្ដែស្រ្ដីអ្នកនាំពាក្យរូបនេះ មិនបានបញ្ជាក់លម្អិត អំពីចំនួនទ័ព ឬកងពលណាបានវាយលុកឆ្លងកាត់ព្រំដែនរបស់ប៉ាឡេស្ទីននោះទេ។
សង្រ្គាមតាមផ្លូវអាកាស បានផ្ទុះឡើងពេញ១ថ្ងៃព្រហស្បតិ៍ រវាងកងទ័ពអ៊ីស្រាអែល និងប៉ាឡេស្ទីន ដោយមានការបាញ់ផ្លោង និងវាយប្រហារតាមអាកាសយ៉ាងខ្លាំង។ ប៉ុន្ដែគេមិនទាន់មានដឹងថា ភាគីទាំងមានអ្នករងរបួស ឬស្លាប់ប៉ុន្មាននាក់នៅឡើយ ហើយរហូតមកដល់ថ្ងៃសុក្រ ទី១៤ ខែឧសភា នេះ ភាគីជម្លោះទាំង២ នៅតែវាយប្រហារគ្នាបន្ដទៀត។ ចំណែកគ្រាប់ផ្លោងរបស់ក្រុមហាម៉ាស ដែលបានបាញ់មកលើដែនដីរបស់អ៊ីស្រាអែលនោះ ត្រូវបានប្រព័ន្ធការពារដែនអាកាស Iron Dome របស់អ៊ីស្រាអែលចាប់បានស្ទើរតែទាំងអស់។
ក្រោយពេលព្រះអាទិត្យលិច នាថ្ងៃទី១៣ ខែឧសភា ការប៉ះទង្គិចគ្នា រវាងពួកជ្វីព និងអារ៉ាប់អ៊ីស្រាអែល បានបន្ដកើតឡើង នៅតាមទីក្រុងជាច្រើន។ រីឯការទម្លាក់គ្រាប់បែកបានធ្វើឱ្យប៉ះពាល់ដល់ការដឹកជញ្ជូន និងហេដ្ឋារចនាសម្ព័ន្ធផ្សេងៗទៀត នៅក្នុងប្រទេសអ៊ីស្រាអែល និងតំបន់ហ្គាហ្សា។ គ្រាប់រ៉ុកែ្កតជាង ១ ៧០០គ្រាប់ ត្រូវបានបាញ់ចេញពីហ្គាហ្សា (Gaza) ធ្លាក់ដូចតំណក់ភ្លៀង ហើយអាកាសយានដ្ឋាន Ben Gurion របស់អ៊ីស្រាអែល ដែលជាបណ្តាញតភ្ជាប់ដ៏សំខាន់របស់ប្រទេសនេះ ទៅកាន់ពិភពខាងក្រៅ ក៏ត្រូវបានបិទដោយគ្មានកំណត់ពេលវេលា ចំពោះជើងហោះហើរ។ ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា រ៉ុក្កែតបានវាយប្រហារមកលើអាកាសយានដ្ឋាន Ramon របស់អ៊ីស្រាអែល ទើបធ្វើឲ្យជើងហោះហើរត្រូវបានបង្វែរទៅកាន់ទិសដៅផ្សេង។
ដោយឡែក ក្រសួងសុខាភិបាល Gaza បានអះអាងថា ការវាយប្រហាររបស់អ៊ីស្រាអែល កាលពីយប់ ថ្ងៃទី១៣ ខែឧសភា ឆ្នាំ២០២១នោះ បានធ្វើឲ្យជនជាតិប៉ាឡេស្ទីន ចំនួន១០៩នាក់រួមទាំងកុមារចំនួន២៨នាក់ បានបាត់បង់ជីវិត និងមនុស្សចំនួន៦២១នាក់ផ្សេងទៀតបានរងរបួស។
ដោយឡែកបណ្ដាញផ្សព្វផ្សាយរបស់លីបង់ កាលពីល្ងាច ថ្ងៃទី១៣ ខែឧសភា បានរាយការណ៍ថា គ្រាប់រ៉ុក្កែតជាច្រើនគ្រាប់ បានបាញ់ចេញពីភាគខាងត្បូង ប្រទេសលីប៉ង់ តម្រង់ទៅកាន់ប្រទេសអ៊ីស្រាអែល។ ប៉ុន្ដែកងទ័ពអ៊ីស្រាអែលបានបញ្ជាក់ថា រ៉ុក្កែតចំនួន៣គ្រាប់បានធ្លាក់ ចូលទៅក្នុងសមុទ្រមេឌីទែររ៉ាណេ។
នៅក្នុងសុន្ទរកថាមួយ លោក Antony Blinken រដ្ឋមន្រ្តីក្រសួងការបរទេស បានបញ្ជាក់យ៉ាងច្បាស់ថា លោកបានបន្ទោសបន្ថែមទៀតទៅលើក្រុមហាម៉ាស ដោយនិយាយថា មានភាពខុសគ្នាជាមូលដ្ឋាន រវាងអង្គការភេរវករ ក្នុងក្រុមហាម៉ាស ដែលកំពុងផ្តោតលើជនស៊ីវិល និងអ៊ីស្រាអែល ដែលកំពុងការពារខ្លួនដោយមិនរើសអើង។ លោក Blinken និងប្រធានាធិបតី Joe Biden នៅតែនិយាយការពារថា អ៊ីស្រាអែលមានសិទ្ធិការពារខ្លួន ហើយត្រូវបានទទួលការរិះគន់ពីសមាជិកសភាអាមេរិកសេរីជាច្រើនរូប៕
