បរទេស៖ រថភ្លើងមួយខ្សែ កំពុងដឹកអ្នកដំណើរ ស្រាប់តែបានជួបនឹងហេតុការណ៍ដ៏អាក្រក់មួយបាក់រលំស្ពានអាកាស បណ្ដាលឲ្យមានមនុស្សស្លាប់ និងរបួសជិត៨០នាក់ នៅភាគខាងត្បូង នៃប្រទេសម៉ិកស៊ីក កាលពីវេលាម៉ោង១០ និង៣០នាទីយប់ ថ្ងៃទី៣ ខែឧសភា ឆ្នាំ២០២១ (វេលានៅប្រទេសម៉ិកស៊ិក)។
ទីភ្នាក់ងារព័ត៌មានស៊ីនហួ គ្រប់គ្រងដោយរដ្ឋចិន បានចេញផ្សាយ នៅថ្ងៃទី៤ ខែឧសភា ឆ្នាំ២០២១ ថា ហេតុការណ៍ដ៏អាក្រក់បាក់រលំផ្លូវរថភ្លើងលើអាកាស បានកើតឡើង នៅក្នុងទីក្រុងម៉ិកស៊ីក ភាគខាងត្បូង ប្រទេសម៉ិកស៊ីក ដោយបានបណ្ដាលឲ្យអ្នកដំណើរ នៅក្នុងរថភ្លើង ចំនួន១៣នាក់ស្លាប់ និង៧០នាក់ផ្សេងទៀតរងរបួស។
លោក Alfonso Suarez del Real មន្រ្ដីជាន់ខ្ពស់ក្រុងម៉ិកស៊ីក បានថ្លែងទៅកាន់អ្នករាយការណ៍ព័ត៌មាន កាលពីយប់ ថ្ងៃទី៣ ខែឧសភា (វេលានៅអាមេរិកខាងជើង) ថា ក្រោយពេលមានហេតុការណ៍នេះកើតឡើង ក្រុមអ្នកជួយសង្គ្រោះបានទៅកាន់កន្លែងកើតហេតុ ដើម្បីជួយសង្គ្រោះដល់ជនរងគ្រោះ ដែលកំពុងជាប់ នៅក្នុងទូរថភ្លើង៕