រាជធានីភ្នំពេញ៖ ក្នុងរយៈពេល២៤ម៉ោងកន្លងមកនេះ ក្រសួងសុខាភិបាលកម្ពុជា បានបន្ដរកឃើញករណីឆ្លងថ្មី នៃកូវីដ-១៩ ចំនួន៤២៩នាក់ ដែលពាក់ព័ន្ធនឹងព្រឹត្ដិការណ៍សហគមន៍ និង២នាក់ ជាអ្នកដំណើរមកពីបរទេស ហើយអ្នកជំងឺចំនួន៣១នាក់ផ្សេងទៀត ត្រូវបានព្យាបាលជាសះស្បើយបន្ថែមទៀត។
ក្រសួងសុខាភិបាលកម្ពុជា បានចេញសេចក្ដីប្រកាសព័ត៌មាន នៅព្រឹក ថ្ងៃទី២០ ខែមេសា ឆ្នាំ២០២១ ថា ក្រសួងបានបន្ដរកឃើញករណីឆ្លងថ្មី នៃកូវីដ-១៩ ចំនួន៤៣១នាក់បន្ថែមទៀត។ ករណីឆ្លងកូវីដ-១៩ថ្មី ទាំង៤៣១នាក់នោះ មានចំនួន៤២៩នាក់ ពាក់ព័ន្ធនឹងព្រឹតិ្ដការណ៍សហគមន៍ ២០ កុម្ភៈ និង២នាក់ផ្សេងទៀត ជាអ្នកដំណើរមកពីបរទេស។ អ្នកឆ្លងកូវីដ-១៩ថ្មីទាំងនោះ រួមមាន អ្នកនៅរាជធានីភ្នំពេញ ចំនួន២៧១នាក់, ខេត្តព្រះសីហនុ ចំនួន១៣៣នាក់, កណ្ដាល ចំនួន១០នាក់, កំពង់ចាម ចំនួន៤នាក់, តាកែវ ចំនួន៤នាក់, ព្រៃវែង ចំនួន២នាក់, ត្បូងឃ្មុំ ចំនួនម្នាក់, ស្វាយរៀង ចំនួនម្នាក់, កំពង់ឆ្នាំង ចំនួនម្នាក់, កំពង់ធំ ម្នាក់ និងខេត្តកំពត ម្នាក់។
ទោះជាយ៉ាងណា បើតាមសេចក្ដីប្រកាសព័ត៌មានរបស់ក្រសួងសុខាភិបាល ក៏បានបង្ហាញសញ្ញាណល្អផងដែរ ដោយសារថ្ងៃនេះ នៅកម្ពុជាមានអ្នកព្យាបាលជាសះស្បើយ ចំនួន៣១នាក់បន្ថែមទៀត។
គិតត្រឹមព្រឹក ថ្ងៃទី២០ ខែមេសា ឆ្នាំ២០២១ នៅកម្ពុជារកឃើញអ្នកឆ្លងកូវីដ១៩ សរុប ៧៤៤៤ នាក់ ហើយក្នុងចំណោមអ្នកជំងឺទាំងនោះ មានអ្នកជាសះស្បើយ ចំនួន ២ ៥៥៥ នាក់ និងអ្នកជំងឺ ៤ ៨៣៥ នាក់ កំពុងសម្រាកព្យាបាល ហើយអ្នកជំងឺចំនួន៤៩នាក់ផ្សេងទៀតបានស្លាប់៕