ខេត្តបាត់ដំបង៖ អាជ្ញាធរខេត្តបាត់ដំបង បានបន្ដបិទផ្នែកខាងក្នុងផ្សារ (តួផ្សារ) នៃផ្សារចំនួន៨ ក្នុងក្រុងបាត់ដំបង និងផ្សារក្នុងស្រុកថ្មគោល ចំនួន២កន្លែងទៀត ជាបណ្ដោះអាសន្ន រយៈពេល៨ថ្ងៃ ចាប់ពីថ្ងៃទី២១ ដល់ថ្ងៃទី២៨ ខែមេសា ឆ្នាំ២០២១ ដើម្បីទប់ស្កាត់កូវីដ-១៩។
រដ្ឋបាលខេត្តបាត់ដំបង បានបញ្ជាក់ នៅក្នុងសេចក្ដីណែនារបស់ខ្លួន នៅថ្ងៃទី១៩ ខែមេសា ឆ្នាំ២០២១ ថា ផ្សារចំនួន៨ នៅក្រុងបាត់ដំបង និងផ្សារចំនួន២កន្លែងទៀត នៅក្នុងថ្មគោល នឹងត្រូវបន្តបិទបណ្ដោះអាសន្ន។ រីឯផ្សារទាំងនោះ រួមមាន៖ ទី១-ផ្សារធំបាត់ដំបង (ផ្សារណាត់),ទី២-ផ្សារបឹងឈូក, ទី៣-ផ្សារ១៣មករា, ទី៤-ផ្សារអប្សារផ្សារលើ, ទី៥-ផ្សាររោងល្ខោន, ទី៦-ផ្សារវត្តលៀប, ទី៧-ផ្សារពោធិ៍វង្ស, ទី៨-ផ្សារទំនើបភូពុយ។ ដោយឡែកផ្សារនៅស្រុកថ្មគោលចំនួន២ទៀត រួមមាន៖ ផ្សារថ្មគោល និង ផ្សារជ្រៃក្នុងស្រុកថ្មគោលមានរយៈពេល៨ថ្ងៃ ចាប់ពីថ្ងៃទី២១ ដល់ថ្ងៃទី២៨ ខែមេសា ឆ្នាំ២០២១ដូចគ្នា។
រដ្ឋបាលខេត្ត បានបន្ថែមទៀតថា ទីតាំងផ្សារទាំង១០នេះ ត្រូវបានអនុញ្ញាតឱ្យលក់ នៅផ្នែកខ្លះនៃបរិវេណខាងក្រៅផ្សារ ដូចជា៖ បន្លែ ត្រី សាច់គ្រឿងឧបភោគ បរិភោគ ដែលជាតម្រូវការចាំបាច់រស់នៅប្រចាំថ្ងៃ ដោយអនុវត្តនូវវិធានការសុខាភិបាលក្នុងការរក្សាគម្លាតសុវត្ថិភាពដោយ ពាក់ម៉ាស និងលាងដៃ និងត្រូវអនុវត្តតាមវិធានការ «៣កុំ និង៣ការពារ» របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា៕
